Carlos Dívar cobrará una indemnización de 208.243 euros

8.676 euros mensuales per dos años. L’ex presidente del Conseyu Xeneral del Poder Judicial (CXPX), Carlos Dívar, cobrará una indemnización de 208.243 euros pola so condición d’ex cargu altu del Estáu.
 
La Comisión d'Estudios y Informes del CXPX dio lluz verde al pidimientu fechu por Dívar, maxistráu que dimitió del so cargu tres destapase un escándalu de malversación de caudales públicos a partir d’una serie de viaxes non xustificaos, con factures altísimes, pagaos con dineru públicu. Por su condición d’ex cargu altu del Estáu, el que fora presidente del Tribunal Supremu y del órganu de gobiernu de los xueces tendría derechu a recibir el 80 por cientu de los sos retribuciones mientres un plazu máximu de dos años. Tres l’aprobación de la so solicitú, los 20 vocales que formen el Plenu del CXPX tienen pendiente de ratificar l'informe de la Comisión.
 
D’esta forma, Dívar recibiría 208.243 euros como indemnización a lo llargo de dos años, yá que’l fechu de que’l cese fora “por renuncia” nun-y impide recibir la pensión. Pa ello tien que renunciar a los cerca de 2.500 euros al mes que recibe pola so xubilación, una decisión non complicada, yá qu’agora pasaría a cobrar 8.676 euros mensuales. Una vegada pasaos los dos años, volvería a cobrar la so xubilación.