La población ayerana de Murias prepara una edición nueva del so mercáu tradicional

Murias va celebrar esta fin de selmana’l XIV Mercáu Tradicional, qu’inclúi munches actividaes pel pueblu. El sábadu van actuar Anabel Santiago y David Varela, mentes que’l domingu van xubise al escenariu Héctor Braga y Marisa Valle Roso.
 
Al igual que l’añu pasáu, l’Asociación Cultural La Colegiata de Murias opta por un formatu de dos díes pa un mercáu qu’atrae al pueblu ayerán a una cantidá grande de visitantes. L’actividá va principiar el sábadu a les 17.30 col actu inaugural, nel que va tar presente l’alcalde David Moreno Bobela, que va consistir nun discursu del primer edil y nun pasucais a cargu del Grupo Tres Colores. Dende esi momentu, les persones que s’averen a Murias van poder atopar puestos d’artesanía, espectáculos, cocina casera y esposiciones, como la etnográfica de llibros antiguos. Pa les 18.30 hores ta prevista una actuación de payasos y a les 19.45 hores una mini-discoteca pa neños y neñes que dará pasu a los conciertos d’Anabel Santiago y David Varela (23 hores).
 
Héctor Braga, xunto a Tres Colores, encargaraáe d’animar el mercáu tradicional a lo llargo del domingu, día nel que l’actividá va dar entamu al meudía. A les 13 hores ta prevista la celebración d’una misa solemne na capiella de la Virxe de les Nieves y, media hora más tarde, la puya’l ramu. Alredor de les 15 hores yá tará llista la paella xigante que servirá pa qu’habitantes del pueblu y visitantes recarguen fuercies de baldre y continúen cola celebración a partir de les 17 hores, cuando va tener llugar una ‘mini-gala de circu’. El campeonatu en braille de parchís con Lucía (18 hores) y sortéu de regalos pa los socios de La Colegiata (18.45 hores) precederán a les actuaciones de Braga (19 hores) y de Marisa Valle Roso (20 hores), que va tar acompañada por Pablo Carrera y Rodrigo Strum.