Xera presenta en conciertu 'Llume' nel Centru Niemeyer

El grupu musical asturianu Xera presenta esti sábadu en conciertu 'Llume' nel Centru Niemeyer. Trátase del primer espectáculu desarrolláu n'Asturies en 5.1 en surround, una modalidá de soníu 3D qu'emplega la ubicació estratéxica de dellos altavoces pa crear un efectu de envolvencia acústica real.
 
Según informó la organización, el grupu quiso dar un pasu más allá na puesta n'escena y nel nivel de los sos directos, pa lo qu'investigó cómo esprimir al máximo los soníos electrónicos. Asina, el públicu pue disfrutar d'una nueva esperiencia con esti directu.
 
'Llume', el so últimu discu, ye'l resultáu de la fusión de los sos trabayos anteriores, 'Lliendes' y 'Tierra', colos que caltién un fondu común: los misterios del ser humanu, d'aquellos aspectos que nos faen meyores.  En 'Llume' el grupu dirixe la so mirada a la sociedá como un elementu vivu y creador, comprometíu y con ganes de cambiu.
 
Xera compónse de Vérval y Flavia, los sos fundadores, amás de Xuan Naveiras a les gaites; Jesús Fernández Porrúa, a la percusión eléctrica, coros y guitarra acústica; y con Gema Palacio Esteban, a los teclaos, theremín y voces.
 
El conciertu de Xera va entamar a les 20.00 hores nel Auditoriu. Les entraes, a un preciu de 10 euros, tán disponibles na Recepción del Centru Niemeyer, na Recepción de Llaboral Ciudá de la Cultura en Xixón, en www.cajastur.es, nel teléfonu 902 106 601 y nos caxeros cajAstur Tiquexpress.

secciones: