36 manifestantes firíos tres una carga policial en Barcelona nuna manifestación contra'l Plan Bolonia

El Serviciu d'Emerxencies Méliques (SEM) atendió esta nueche a 36 estudiantes y, según la versión policial, 46 mosos, toos ellos firíos dempués de que los manifestantes 'antibolonia' entamaren una concentración sin autorización na Plaza Universitaria, informaron a Europa Press fontes de la Policía de la Generalitat.
 
Polo menos una persona resultó detenida nel trescursu de la manifestación, a la a qu'asistieron 2.500 persones, según la Guardia Urbana, y 5.000 según el Sindicat d'Estudiants dels Països Catalans (SEPC).
 
La concentración convocárese pa les 20.00 hores, en protesta pol desagospiu esta mañana d'una cincuentena d'estudiantes de la Universidá de Barcelona (UB), nel que se produxeron delles cargues policiales.
 
Tres los incidentes, abogaos, vecinos y entidaes de derechos humanos de Barcelona exixeron a la Conseyería d'Interior que depure responsabilidaes ante les cargues de los  Mossos.
 
La Comisión de Defensa de los Derechos de la Persona del Colexu d'Abogaos de Barcelona, la Federación d'Asociaciones de Vecinos de Barclona, L'observatoriu del Sistema Penal, y los Derechos Humanos de la UB, l'Asociación Catalana de Defensa de los Derechos Humanos y l'obervatoriu de los derechos económicos, sociales y culturales emitieron un duru comunicáu contra'l rector de la UB, Dídac Ramírez, y Interior.
 
Reclamaron que s'abra una investigación pa determinar si la gravedá de los fechos ye "atribuyible sólo" a los axentes antidisturbios o existió "dalgún otru tipu de responsaiblidá o participación de los sos superiores xerárquicos". Tres ella, debíen tomase responsabilidaes y derivar "posibles ceses".
 
SAURA ENCARGA UN INFORME
 
Pela so parte, el conseyeru d'Interior de Cataluña, Joan Saura, anunció güei qu'encargó un informe policial pa conocer el detalle de l'actuación de los Mossos d'Esquadra nes protestes d'ayeri contra'l Plan Bolonia y evitó calificala hasta tener esi documentu, tres lo que va declarar nel Parlamentu pa dar esplicaciones.
 
En rueda prensa na cámara autonómica, Saura almitió que les consecuencies de les protestes d'ayeri "nun-y presten y preocúpen-y", y pidió disculpes a les persones que resultaron firíes, 46 mosos y 35 persones más.
 
El titular del Interior indicó que los axentes actuaron correctamente nel desagospiu del Edificiu Históricu de la Universitat de Barcelona (UB) por pidimientu del so rector, pero añadió que "seguro qu'hubo dalgunos errores que facilitaron una situación final que nun pue agradar a naide". "Nengún responsable políticu d'Interior pue tar contentu con una xornada na qu'hai más de 80 firíos", añadió.
 
Descartó midíes preventives pero nun refugó que puean tomase dalgunes decisiones en función el informe yá encargáu.
 
De toes maneres, Saura asitió l'orixe del conflictu na actitú violenta d'una minoría, y sorrayó que l'oxetivu y el deber de la Policía catalana ye preservar el derechu a la manifestación.