Skip to content

De Guindos solicita, de manera formal, el rescate bancariu a España

Xunu 25, 2012 por E.P. / Redacción

El ministru d’Economía y Competividá, Luis de Guindos, solicitó de manera formal na mañana d'esti llunes el rescate bancariu a España. Unvió una carta al presidente del Eurogrupu, Jean-Claude Juncker.
 
"Tengo l'honor de dirixime a usté en nome del Gobiernu d'España, pa solicitar formalmente asistencia financiera pa la recapitalización de les entidaes financieres españoles qu'asina lo requieran", comienza l’escritu. Darréu, De Guindos recuerda que l'asistencia enmárcase dientro de los términos alcordaos pa la recapitalización de les instituciones financieres y, asegura, que la elleición del instrumentu nel que se va materializar l'ayuda va tener en consideración les distintes posibilidaes disponibles y les que puedan decidise nel futuru. El titular del Departamentu d'Economía tamién asegura que l'Executivu valora "mui favorablemente" la declaración de los ministros de Eurogrupu del pasáu 9 de xunu, nel qu'apoyaron "el determín" de les autoridaes españoles de reestructurar la banca y la so intención de pidir asistencia financiera.
 
Esta asistencia, que va dedicase a la recapitalización de les entidaes financieres que la precisen, va concretase nuna cantidá abondo pa cubrir les necesidaes de capital, más un marxe de seguridá adicional, hasta un máximu de 100.000 millones d’euros. El Fondu de Reestructuración Ordenada Bancaria (FROB), que va actuar en representación del Gobiernu, va ser la institución receptora de los fondos que van canalizase depués a les entidaes financieres.
 
Una vegada unviada la carta, el Gobiernu va entamar la negociación sobre les condiciones de rescate, tovía por determinar. Ello ye que nel escritu, De Guindos ofreció la collaboración y l'ayuda del Gobiernu estatal nesta materia. En concreto, el ministru asegura que les autoridaes españoles van ufrir "tol so apoyu" na valoración de los criterios de elixibilidá, la definición de la condicionalidá financiera, el siguimientu de les midíes a implantar y na definición de los contratos d'ayuda financiera. L'oxetivu, tal como relata'l titular d'Economía na carta, ye rematar el 'Memorándum d'Entendimientu' enantes del 9 de xunetu pa que pueda debatise na reunión próxima del Eurogrupu.

Comparte...