Skip to content

Asturies celebra esti sábadu San Xuan cola tradicional quema de fogueres y l'engalanamientu de fontes

Xunu 22, 2012 por Pablo R. Guardado

Na medianueche d’esti sábadu cientes de fogueres van quemar n’Asturies pa celebrar San Xuan. La nueche más máxica del añu va trayer un abanicu grande d’opciones pa disfutar d’una de les cites más esperaes del añu.

La mayoría de ciudaes y pueblos del país –y munchos barrios– tienen preparaes pa esta nueche fogueres pa celebrar el solsticiu de branu y quemar los augurios malos. Una tradición de raigaños celtes que entovía ta mui viva n’Asturies y que ye un cultu al sol y al agua al traviés del engalanamientu de fontes.

La foguera más multitudinaria ye la qu’entama’l Conceyu de Xixón na sablera d’El Natahoyo, qu’esti añu va tener un cartel mui atractivu no musical. Alredor de les 23.15 hores van actuar los mierenses Macadamia pa, depués de la quema de la foguera y la danza prima, dar pasu a Dixebra, qu’esti añu tán cola xira del so vixésimuquintu aniversariu, na que ye posible sentir clásicos de la banda que los avilesinos nun tocaben en direutu dende hai tiempu.

Otra cita con gran influencia de visitantes y muncha tradición ye la de Corvera, en Tresona. A les 22 hores ta previsto l’entamu d’actividaes con un pasucais de la Banda Gaites Corvera d'Asturies, a la que va siguir la primer actuación de la nueche: La Bandina. Un espectáculu del grupu de teatru Nun Tris amenizará la quema de la foguera, pa depués siguir la folixa hasta altes hores de la madrugada cola música de Tejedor y de La Coḷḷá Propinde.

En Caravia, na playa La Espasa, mantiénse la celebración de la foguera pese al cambiu radical que sufre la folixa, yá qu’esti añu nun va haber conciertos rock, como yera vezu. El folk toma’l relevu nesti 2012  y, tres la medianueche, van actuar P'Amusquis y Asturiana Mining Company. Mentes, na cuenca’l Nalón, una bona opción ye la qu’entama en L’Entregu’l Centru Social Autoxestionáu La Semiente. Les muyeres entreguines van enrramar les fontes del pueblu pa qu’amanezan engalanaes, como manda la tradición y, a les 18 hores, va principiar la fiesta nel prau asitiáu xunto al campu de fútbol Nuevu Nalón cola celebración de deportes tradicionales. A les 21 hores, los cabezudos van facer un pasucais peles casi de L’Entregu y, una hora enantes de la quema de la foguera, va representase un espectáculu de maxa a cargu de la compañía Tatata Chan! a la que siguirá una apaición de personaxes mitolóxicos, que van encargase de prender la foguera. Tres la quema y el baille de la danza prima, la folixa continuará hasta l’alborecer.

 

Comparte...