El Xardín Botánicu va vivir una xornada de terror cola proyeición de ‘La nueche de los muertos vivientes’

|

El Xardín Botánicu entama esti vienres una actividá venceyada al cine de terror que ta enmarcada nos actos del cincuenta aniversariu del FICXixón. Ente otres coses, los participantes van poder ver ‘La nueche de los muertos vivientes’.
 
La ‘Noche de terror en el Botánico’ va principiar a les 22.30 hores con un paséu terroríficu pol recintu que va dexar xeláu a más d’ún. Darréu va tener llugar una charra-coloquiu con dos espertos nel xéneru de terror como l’escritor y periodista xixonés Juan José Plans y el tamién escritor y críticu de cine Jesús Palacios. Xunto col ex direutor del Festival Internacional de Cine de Xixón (FICXixón) y el madrilanu, van participar tamién Jesús Martínez, direutor del Xardín Botánicu Atlánticu y el realizador y responsable de Gonzali Producciones, Illán Gonzali. Modera l’actu, el xestor cultural Humberto Gonzali.
 
L’actividá cabera d’esta nueche de terror va ser la proyeición al aire llibre de ‘La nueche de los muertos vivientes’, versión doblada al asturianu del clásicu de George A. Romero. Nel so doblaxe participaron Antón Caamaño, Fernando Marrot, Carlos Alba, Ana Blanco, Ana Díaz Morán, Berto Álvarez Peña, Norberto Sánchez, Rodrigo Alba, Carlos Novoa, Cristobal Ruitiña y Hugo García; siendo Antón Caamaño tamién director de doblaxe y Illán Gonzali, el productor executivu. Tres el visionáu de la cinta, la cafetería del Botánicu va permanecer abierta, anque los organizadores recomienden a les persones que quieran allargan la nueche que tean sollertes polo que pudiera pasar. El preciu pa participar nesta actividá ye de 5 euros. Les entraes pueden adquirise na puerta de la instalación, nes oficines de InfoXixón o al traviés d’Internet.

Contador Estadistiques