El Ministeriu de Mediu Ambiente edita un DVD sobre'l castañu de San Estaban (Peñamellera Baxa)

El Ministeriu de Mediu Ambiente, Mediu Rural y Marín editó un DVD, dientro de la serie 'Fondu documental audiovisual modernu', denomináu 'El castaño de San Esteban', que se rodó na aldea asturiana de San Esteban, en Peñamellera Baxa.

La cinta ye una producción de la Mediateca Dixital pa la Plataforma del conocimientu pal mediu rural y pesqueru, adautada del relatu del mesmu títulu publicáu en 'El Regreso del señor Hoffmann y otros relatos de ambiente entero', de Jaime Izquierdo, asesor del Gabinete del Ministeriu de Mediu Ambiente y Mediu Rural y Marín, especializáu en temes de desarrollu rural.
 
El relatu, que dura diez minutos, desarróllase en San Esteban, aldea de la vertiente asturiana de Los Picos d'Europa, y ye un homenaxe de reconocencia a los pueblos de montaña. Esta obra tenta d'espeyar lo qu'asocedió en San Esteban, dende qu'en 1994 una fuerte tormenta valtó'l vieyu castañu que demientres casi cuatro sieglos presidiere la plaza, hasta que lu recuperaron los vecinos, dempués de tar tiráu nel suelu tres años.
 
El cortu divídese en tres partes: la primera presenta'l pueblu de San Esteban y la so xente, la segunda parte narra la muerte del castañu y la tercera cuenta la so recuperación.