La Procuradora Xeneral y dellos espertos alvierten de la perda de derechos por efeutu de la crisis

Les polítiques que se tán aplicando pola crisis frayen el derechu a la vivienda, a la educación y a les ayudes sociales a los más desfavorecíos. Ésta ye la opinión de la Procuradora Xeneral y de dellos espertos en derechu.
 
María Antonia Fernández Felgueroso participó güei nunes xornaes entamaes pola propia Procuradoría Xeneral d’Asturies na que tomaron la pallabra Laura Díez Bueso, profesora de Derechu Constitucional de la Universitat de Barcelona; Gerardo Pisarello, vicepresidente del Observatorio de Derechos Económicos, Sociales y Culturales; y Tomás de la Quadra-Salcedo, profesor de Derechu Constitucional de la Universidad Autónoma de Madrid. En pallabres de Díaz Bueso, los derechos sociales "son los primeros perxudicaos", n’especial "el de la vivienda, yá qu’hai munches persones que la perdieron y nunca pensaren en que llegaríen a esta situación". Pero tamién mentó’l de "la educación, a nivel de Primaria, Secundaria y universitaria", y, por último, los servicios sociales al haber "persones que nun lleguen a fin de mes y que necesiten comer cada día". Dende’l so puntu vista, l’Estáu de Bienestar "non sólo cuerre riesgu, sinón que yá ta sufriendo los recortes".
 
Pisarello, pela so parte, recordó que’l Comité de Derechos Sociales y Económicos de Naciones Xuníes emitió recién unas recomendaciones "bastantes dures pola merma de derechos afeutaos pola crisis", y porque "les polítiques de recorte que se tán faciendo tienen sesgos discriminatorios, como en rellación a la población inmigrante" Amás, noma los "recortes en materia de sanidá o educación, o l’incrementu desproporcionáu de tases universitaries".
 
Mentes, na so intervención, Fernández Felgueroso amosó’l so esmolecimientu por "la situación na que s’alcuentren dellos coleutivos cada vez mayores". Apuntó que, a la so institución, "lleguen ciudadanos preocupaos al tar en situaciones difíciles para que-yos orientemos". Trátense d’ámbitos nos que mantién casi 60 convenios con organizaciones sociales "que representen a les persones mayores, al mundu de la discapacidá, de la probeza y de la esclusión social".

secciones: