Iniciativa pol Asturianu llamenta’l refugu del PP zamoranu a establecer midíes de proteición pal asturlleonés

El PP de Zamora tumbó’l 18 de mayu pasáu una propuesta d’ADEIZA na Diputación pa establecer midíes de proteición pal asturlleonés y el gallegu. Iniciativa pol Asturianu llamenta’l vetu a los derechos llingüísticos nesta provincia.
 
Antonio Juanes García, representante de l’Agrupación de Electores Independientes Zamoranos (ADEIZA) na Diputación, propunxo l’establecimientu de la promoción del asturlleonés y el gallegu nes zones de la provincia onde tovía tienen vitalidá díes depués d’aconceyar con Furmientu, coleutivu de defensa de les llingües tradicionales de Zamora. La iniciativa de Juanes tuvo’l sofitu del PSOE y d’IX, anque non del PP, que nun permitió nin l’alderique na Cámara.
 
Iniciativa pol Asturianu, al traviés de vocalía de dominiu llingüísticu de la organización, coordinada por Denis Soria, amosó la so solidaridá con ADEIZA y Formientu, organizaciones coles que contautó “p'apoyar el so compromisu en favor del idioma y ofrecer tola collaboración posible nesti ámbitu, al ser un sector importante de la sociedá zamorana y asturiana parte d'una mesma comunidá llingüística”. Dende’l so entamu, esti coleutivu tuvo como ún de los sos oxetivos a trabayar tamién xunto a otres asociaciones pa la reconocencia y proteición del idioma en territorios onde’l asturlleonés sía llingua propia, como amuesa’l conceyu que mantuvo’l 1 d’abril n’Estorga con La Caleya, Faceira y Formientu.

secciones: