Músicos de sonadía van impartir en Grau un taller de folk de cuatro díes de duración pa revitalizar el xéneru

La Escuela de Música de Grau y l’Asociación Cuatro Notes entamen, ente’l 19 y el 22 de xunetu, un taller de música folk. Nesta esperiencia novedosa, los alumnos y alumnes participantes van tener maestros d’esceición.
 
Asina, la nómina de músicos que van impartir les clases d’esti I Taller de Música Folk ta formada por Pepín de Muñalén (flauta), Iñaki Santianes (gaita), Xosé Ambás (voz, repertoriu y trabayu de campu), Elías García (bouzouki y guitarra) y Antón Barquero (batería y percusión). Xaime Arias encárgase de la direición del cursu y de dar clase d’harmonía y teclaos. Dende la organización afirmen que’l motivu principal que lleva a entamar esti eventu ye “divulgar la música tradicional y facilitar el contautu ente los alumnos que comparten esta mesma esmolición, potenciando asina la creación de bandes nueves que revitalicen el xéneru y permitan una continuidá y una evolución del mesmu”.
 
La Escuela Municipal de Música de Grau va ser sede de toles clases del taller, que tien una duración de 18 hores llectives y un preciu de matrícula de 100 euros. Les persones interesaes en formalizar la inscripción o n’algamar más información pueden facelo al traviés de los teléfonos 985.75.46.57 y 651.016.634. Hai que destacar que’esti I Taller de Música Folk coincide coles fiestes de Santiago y Santana.
 
Campus musical pa neños y neñes ente 5 y 15 años
 
La sede de la Escuela de Música de Grau tamién va acoyer, ente’l 23 y 30 de xunu, el III Campus Musical destináu a neños y neñes ente los 5 y 15 años. Nél, los alumnos van poder aprender a tocar la guitarra eléctrica, la batería, el baxu, el pianu o la flauta travesera. A lo llargo del cursu, van dir formándose dellos grupos de rock que van actuar nel conciertu de despedida.La organización del campus ufre la posibilidá de participar como internu, con un preciu de 250 euros, o facer nueche en casa, nesti casu con una matricula de 190 euros. Éstos últimos tendríen un horariu de 10 a 20 hores.

secciones: