Una concentración reivindicó énte la Xunta Xeneral la soberanía de les instituciones asturianes

Delles decenes de persones concentráronse’l sábadu frente a la Xunta Xeneral, coincidiendo cola toma de posesión de Javier Fernández, pa conmemorar el 25 de mayu. Reivindicaron la soberanía de les instituciones asturianes.
 
Baxo’l lema ‘Asturies decide’, un día depués del 204 aniversariu de la proclamación de soberanía de la Xunta Xeneral, estos ciudadanos reivindicaron "la soberanía y la capacidá de decisión de les instituciones asturianes”. “Creemos qu’Asturies tien competencies n’educación y sanidá; ye soberana; y esta Xunta Xeneral tien capacidá pa decidir si s’apliquen les polítiques que vienen de Madrid o de Bruxeles", declaró un voceru a Europa Press. Los manifestantes pitaron a les autoridaes que se desplazaron a Asturies p’asistir a la toma de posesión de Fernández, como la ministra de Fomentu, Ana Pastor, o’l líder de la oposición nel Congresu, Alfredo Pérez Rubalcaba. Asina, el voceru esplicó que la pitada, que s’allargó tol actu, diba dirixida a Pastor como "miembru del Gobiernu del PP", asina como "hacia tola clase política, non sólo de Madrid, sinón tamién d’Asturies", pertenecientes a "tolos partíos".
 
Otro participante de la protesta reprochó que "nun val venir a facese la semeya; nun val dicir que nun vamos recortar; nun val formar un Gobiernu nuevu que se diz socialista y recortar". "El refugu más absolutu y la más contundente pitada pa que s’enteren de que nin la educación se vende, nin la soberanía asturiana ta en venta", resumió.
 
Xunto a la concentración en defensa de les instituciones asturianes, tuvo llugar otra de los profesionales del enseñu y d’estudiantes a favor de la enseñanza pública. Éstos, vistíos con camisetes verdes, tamién pitaron a los politícos y autoridaes presentes na toma de posesión de Fernández y corearon lemes como ‘No al despido de docentes interinos’ o ‘Contra’l decretazu, madreñazu”.