Skip to content

CO OO y UXT convoquen cuatro díes de fuelga en tola minería del carbón polos recortes previstos

Mayu 21, 2012 por E.P. / Redacción

Los dirixentes estatales de les federaciones de minería d'UXT y CO OO decidieron esti llunes n’Uviéu convocar cuatro díes de fuelga polos recortes previstos. El sector del carbón va parar el miércoles y el xueves, y el 30 y el 31 d’esti mes.
 
El xueves va celebrase tamién una concentración en caúna de les zones mineres del Estáu y el día 31 va haber una manifestación conxunta en Madrid. Esti alcuerdu ratificóse mientres una xunta n'Uviéu de los dirixentes de les federaciones de la minería de CC OO y de la d'industria y trabayadores agrarios (Fitag) d'UXT, Juan Carlos Álvarez Liébana y Víctor Fernández, de forma respeutiva. Los dos sindicatos reclamen al Executivu de Mariano Rajoy que "cumpla colos sos compromisos" y dea "un pasu atrás" nes tresferencies previstes pa la minería nel proyeutu de Presupuestos Xenerales del Estáu pal 2012, que suponen "la condena del sector" y "el zarru de l'actividá", aseguró nuna rueda prensa posterior a la xunta Álvarez Liébana.
 
Nesti sen, Fernández dixo que nel 2012 les partíes destinaes a la producción de mineral recibiría un 64 por cientu menos que l'añu anterior, pasando de 703 a 253 millones d'euros. En concreto, les ayudes a empreses van pasar de 301 a 111 millones, les d'infraestructures de 167 a 101 (-39 por cientu) y les de proyectos empresariales de 167 a 39 (-76,6 por cientu). Coles mesmes, les partíes pa formación y beques van cayer de 56 millones a 2 (-99,96 por cientu) y les de seguridá minera, que nel 2011 cifróse en 12 millones, van anulase. Estos recortes supondríen, según Liébana, "una agresión nunca vista" nel sector mineru y llevaríenmos "al ostracismu más absolutu". "Esta situación nun pretende más que'l zarru del sector y condena a les zones mineres a la esraizadura social y económico", añadió.
 
Liébana esplicó que la fuelga nun yera la primer opción de los sindicatos mineros, pero que, tres la rotura del diálogu social, viéronse "obligaos" a tomar estes midíes. Con elles pretenden buscar soluciones dirixíes a la sobrevivencia del sector y, pa ello, van esixir al Gobiernu "que cumpla los sos compromisos".De lo contrario, estes midíes nun van quedar nestes concentraciones, dixo, dao que tán dispuestos a tomar "les decisiones necesaries" pa evitar "la muerte" de la minería.

Comparte...