Skip to content

FSA-PSOE va tener como prioridá la ellaboración d’un plan d’axuste nuevu

Mayu 18, 2012 por E.P. / Redacción

Jesús Gutiérrez, secretariu d’Organización de FSA-PSOE, señaló que la prioridá principal del Gobiernu entrante va ser la ellaboración d’un plan de reequilibriu nuevu. Asturies tien que presentalu al Estáu en 15 díes con un axuste de 616 millones.
 
"Si agora hai una conseyería qu’apura tener yá na cabeza ye la conseyería de Facienda", insistió Gutiérrez en declaraciones a la RTPA. El dirixente socialista xustifícalo señalando qu’hai una esixencia del Gobiernu estatal con un plazu mui breve, de 15 díes, pa qu’Asturies faiga los númberos y se presenten nel Conseyu de Política Fiscal y Financiera (CPFF) pa la so aprobación. El Ministeriu de Facienda y Alministraciones Públiques alvirtió ayeri al Gobiernu en funciones que si nun recorta gastos en sanidá y educación nun podrá aprobar el so Plan de Reequilibriu Presupuestariu, que foi refugáu na reunión del CPFF en Madrid. L’Executivu tien agora quince días pa presentar un axuste de 616 millones d’euros qu’ha d’incluyir midíes adicionales pa garantizar que’l país sía quien a reducir el déficit públicu al 1,5 por cientu, yá que’l Plan presentáu por Foro, a xuiciu del Estáu, ye insuficiente.
 
El conseyeru de Facienda en funciones, Ramón del Riego, aseguró güei qu’Asturies tien les cuentes públiques saneaes yá que, por mor de la "política de contención de gastu" que fixeron, presenten un superávit de 68 millones d’euros nel primer trimestre del 2012. "Les cuentes asturianes presenten a la fecha superávit a diferencia de la mayoría de les comunidaes. Tamos financieramente saneaos", valoró. Del Riego tamién señaló que la situación d’Asturies ye "ciertamente especial y peculiar" al tener un executivu en funciones: "Nun podemos comprometer con los nuesos actos al gobiernu entrante”, destacó.

Comparte...