Skip to content

PSOE y UPyD algamen un acuerdu

Mayu 16, 2012 por E.P. / Redacción

PSOE y UPyD algamaron un acuerdu que va permitir qu'Asturies cuente con Gobiernu. L'apoyu del diputáu d'UPyD, Ignacio Prendes, resulta imprescindible ante un posible empate na investidura ente los dos alternatives de PSOE-IU y de Foru-PP, dao qu'ambes sumen 22 votos.
 
D'esta manera, el candidatu socialista, Javier Fernández, que de primeres yá se ganó l'apoyu na investidura d'IU, va ser el próximu presidente d'Asturies, sostituyendo nel cargu a Francisco Álvarez-Cascos (Foru). La sesión d'investidura va empezar el próximu día 22 a les 10.00 hores.
L'alcuerdu confirmólu de primeres UPyD al traviés de la so cuenta de Twitter oficial, na que señalaba qu'Ignacio Priendes esplicaría na tarde d'esti miércoles nuna rueda prensa l'acuerdu de llexislatura algamáu colos socialistes.
De siguíos, sicasí, y tres la convocatoria oficial de la mentada rueda prensa, los términos pa referise al acuerdu cambiaron. Asina, falen de que lo qu'existe ente PSOE y UPyD ye "un principiu d'acuerdu". La rueda de prensa va tener llugar a les 19.00 hores y na mesma van tar presentes tantu Prendes como la vocera nacional d'Unión, Progresu y Democracia, Rosa Díez.
 
Tres los resultaos producíes el pasáu 25 de marzu nes elecciones autonómiques, con 17 diputaos pal PSOE, 12 pa Foru, 10 pal PP, 5 para IU y ún pa UPyD, Prendes ofrecióse dende'l principiu pa negociar col restu de fuerces polítiques. A lo único que s'oponía yera a entrar nel Gobiernu. Pero taba abiertu a distintes fórmules, dende un pactu d'investidura, pactos puntuales o un pactu de lexislatura.
 
Prendes punxo sobre la mesa un documentu, que fizo públicu pa negociar los principios que diba defender colos distintos acuerdos. Les negociaciones fueron dende'l principiu más fluyíes col PSOE, puesto que bien pronto Javier Fernández llogró l'apoyu d'IU pa la investidura. PSOE y IU tuvieron intercambiando información y reuniéndose. Hasta qu'a lo último, el xueves día 10 de mayu les postures taben yá tan cercanes que Prendes mostrábase partidariu a un acuerdu de llexislatura. Sicasí, nun se zarró l'acuerdu porque los socialistes nun yeren partidarios, nos términos propuestos, del cambiu na llei electoral pa qu'Asturies contara con circunscripción única.
 
Foi con posterioridá a esa xunta, esti llunes, cuando Prendes se  reunió con Francisco Álvarez-Cascos, el candidatu del bloque Foru-PP, una vez que'l PP anunciara qu'apoyaría a Cascos si llograba l'apoyu de Prendes. Foru ofreció a UPyD un puestu nel Gobiernu y treslladó un programa de Gobiernu pal so estudiu.
 
Prendes tuvo esti martes en Madrid nuna reunión d'UPyD a nivel nacional na que se diba a "falar d'Asturies", según señalaren fontes de la formación de Díez. Esti miércoles confirmaron que tienen un principiu d'acuerdu col PSOE.

Comparte...                                    

Comentarios

Por arte y gracia d´UPyD,

Mayu 17, 2012 por llexitimista, hai 1 añu 47 selmanes
Id del comentariu14904

Por arte y gracia d´UPyD, tamién conocíu como "El partíu de Rosa Díez" y "Esa mierda", venimos de recular trelce años. Albízores, yá manda´l Pelucu (H.avier Fernández)!

Izquierda y neofacistes gobernarán Asturies.

Mayu 16, 2012 por Pelayu Coloráu, hai 1 añu 47 selmanes
Id del comentariu14903

Izquierda y neofacistes gobernarán Asturies.
(del blog "Cuquiellín del Rei"):

 
Bono, yá ta. La izquierda del réximen clientelar y los neofacistes van gobernar Asturies. Asina que volvemos a lo de siempre.

Cuando’l FAC llogró’l gobiernu cuatro nacionalistes que nunca escarmamos y testeriamos en dar voces en castañéu encamentémoslo. Había que se guiar pola prudencia ya’l procuru políticos porque entrar nel xuegu de puñar contra los foristes engabitaba a los de siempre a retomar el poder.

Naide nun fixo casu y la mayoría del asturianismu tiróse de calón a sigui-yos el xuegu a la izquierda plural. Dos botones de muestra. Ún l’alliniamientu con esa izquierda cuando l’espolín del cambiu de dirección del FICX. Otru, el desdexamientu o la culpabilización del gobiernu en funciones ante l’amenaza d’intervenir la nuestra autonomía pol gobiernu central y, aprovechando’l llamentable porceder toponímicu nel festival citáu, a centrar tolos ataques nesto cabero como si tuviere muncha más importancia que lo anterior.

Y exemplos a esgaya que se podríen amestar. Porque dende l’asturianismu en xeneral ya’l políticu en particular quedaron clares tres coses. La primera, que se prefier la compañía de la izquierda xacobina española a la de cualquier otra fuerza que nun lleve pedigrí izquierdista. La segunda, que nun hai visión de país dala. Y la tercera que l’infantilismu ye un andanciu que cute a tou quisqui con independencia de la edá real.

Al final tornemos a lo que teníemos. Quiciabes agora esi “asturianismu” ensin el más ñarru rispiu de visión nacional, recuérdolo otra vuelta, va entamar a quexase -menos la parte del mesmu que foza del duernu- ante lo que nos pue venir encima. Polo qu’a min se refier nun pienso gorgutar contra les inxusticies que, a magüeyu y de xuro, nos va arreflundir el nuevu gobiernu hasta qu’acabe esta llexislatura. Qu’ún tamién tien derechu al so descansu.

Asina qu’a la xermandía de quexones que nunca nun son pa construir nada y fuera del espatuxu y les llárimes nun s’afayen habría que-yos recordar que sarna con gustu nun pica. Y que cuando daquién anecia nos errores tien lo que se merez.

-¡Meca, el Fernández va frayanos otra vegada col réximen clientelar!-

-¡Pues h.ódete y bailla, manín!. Agora, ¡h.odete y bailla!.

 

 
Fontes. Más info na rede sobre esta noticia [ http://cuquiellindelrei.wordpress.com/2012/05/16/izquierda-y-neofacistes-gobernaran-asturies-17/ ]