Bertu Peña espón nel so últimu ensayu que los santos asturianos son dioses paganos del politeísmu precristianu

L'investigador y escritor Bertu Álvarez Peña señala nel so últimu estudiu, 'Mitoloxía sobre los santos n'Asturies. Raigaños paganos del cristianismu', premiu d'ensayu Fierro Botas 2011, que'l cristianismu inventó los Santos cristianos pa da-y acoyida na so relixón a los antiguos dioses de les creencies politeístes paganes europees, anteriores a Cristo.
 
Peña presenta la so obra esti xueves, el xueves 17 de mayu va presentase, a les 19 hores, nel salón de recepciones de la Casa Conceyu de Xixón.
 
Según espón nel llibru, "el cristianismu primitivu buscó agospiu dientro'l monoteísmu a unos dioses que se calteníen vivos na creencia popular, que, polo normal, facíen referencia a la naturaleza y teníen el valir d'ayudar a los humanos na comprensión de los sos fenómenos".
 
Asina, "los santos católicos nun son otro qu'aquellos dioses pequeñinos (afataos con ropa nuevo y con biografíes terroríficamente fantasioses), que garren pa sigo les cualidaes protectores y salvadores de los dioses antiguos", señala l'investigador.
 
'Mitoloxía de los santos n'Asturies' rastrexa pente la cultura popular y les ilesies asturianes los raigaños paganos de los que bebió y s'alimentó'l cristianismu de los primeros años. "Si, como ta de moda dicir, Europa ye lo que ye pola influencia del cristianismu, nun ta demás acordar qu'ésti ye, tamién, lo que ye poles influencies paganes que, dilíes na corriente continua del so monoteísmu, son tovía reconocibles, na memoria colectiva de l'Asturies d'anguaño", considera Peña.
 
Alberto Álvarez Peña (Xixón, 1966) ye un perconocíu estudiosu de la cultura y la mitoloxía asturiana, escritor y dibuxante, creador de cómic y cartelista. Tien publicaos, ente más otros, los llibros 'Asturias mágica y Cuélebres, culuobras, culiebres y culiebrones. La culiebra na mitoloxía asturiana'.