Skip to content

Abiertu’l plazu p’apuntase pal XIII Concursu de Gaiteros y Gaiteres Mozos de Bimenes

Mayu 10, 2012 por Pablo R. Guardado

El Conceyu de Bimenes anunció l’apertura del plazu d’inscripción pal XIII Concursu de Gaiteros y Gaiteres Mozos. El requisitu únicu pa participar nél y optar al premiu de 300 euros ye ser menor de 21 años a fecha del 31 de mayu.
 
El día caberu p’apurrir tola documentación afayadiza al Conceyu ye’l 6 de xunu a les 12 hores. La propuesta d’inscripción tien de formalizase unviando per corréu los datos personales y una copia del DNI al Conceyu de Bimenes (Martimpoporra s/n, col códigu postal 33527). Nun primer momentu, el concursu va tener semifinal (9 de xunu, a les 11 hores, na Casa la Cultura de Santuyano) y final, anque si’l númberu d’inscritos ye menor de 14 namái va tar compuestu d’una eliminatoria, que va tener llugar el 16 de xunu nel Palaciu del Marqués de Casa Estrada nel marcu de la Fiesta pola Oficialidá. Nesta final, cada concursante ha d’interpretar dos cantares, ún de llibre eleición y otru d’esta llista: Muñeira de Remis, Floréu de Remis, Diana floriada de Veriña, Fandangu puntiáu, Muñeira Barganaz, Xota’l centru, Muñeira Lliberdón, Alborada’l paxarín, Xota l’oriente, Carretera d’Avilés y Saltón.
 
Los concursantes han d’emplegar nel concursu una gaita tradicional asturiana (d’un solu roncón) en cualesquiera de les sos modalidaes y han d’usar un traxe tradicional asturianu (obligatoriu namái na final). El ganador del primer premiu va llevase 300 euros y un troféu, mentes el segundu va ganar 200 euros y troféu, y el terceru, 100 euros y trofréu. L’añu pasáu, el vencedor del Concursu de Gaiteros y Gaiteres Mozos de Bimenes foi’l maliayu Francisco Fernández Álvarez, mentes que los sierenses Álvaro Álvarez Fernández y Fernando Vázquez Cárcaba terminaron segundu y terceru, de manera respeutiva.

AdxuntuTamañu
Bases del XIII Concursu de Gaiteros y Gaiteres Mozos de Bimenes.pdf144.7 KB
Comparte...