El XXIV Conciertu pola Oficialidá presenta en Xixón siete bandes de dellos estilos en llingua asturiana

El sábadu, a les 19.30 hores, el tríu De Miguel, Wolfe y Quintana va abrir les actuaciones del XXIV Conciertu pola Oficialidá, que presenta otres seis bandes de dellos estilos. El xixonés Parque Inglés acueye esti eventu
 
Xunta Moza, estaya de mocedá de la Xunta pola Defensa de la Llingua Asturiana (XDLA), preparó pa esti añu’l cartelu quiciabes más ricu de tolos celebraos hasta la fecha. Siete bandes d’estilos bien diferenciaos van xubise a los dos escenarios instalaos na carpa del Parque de los Hermanos Castro –conocíu popularmente como’l Parque Inglés– p’amosar el so sofitu a la reivindicación llingüística y convertir el llugar nuna fiesta. Tres l’actuación del tríu autor del trabayu ‘Xota pa tres’ cola so fusión de jazz y música tradicional van actuar, nesti orde, Macadamia, Tuenda, La Bandina, Alfredo González, Dixebra y Fala non Caduca.
 
La entrada na puerta tien un coste de 10 euros –8 anticipada– y la organización va disponer pal públicu una barra con precios populares. Como novedá nesta edición, va rifase ente les persones que merquen dalguna consumición una fin de selmana pa dos persones n’Asiegu (Cabrales), premiu qu’inclúi l’agospiu, una caxa sidra y la Ruta del Quesu y la Sidra.

secciones: