L’Estáu español entra en recesión tres rexistrar una cayida del PIB del 0,4 por cientu nel primer trimestre

La economía estatal entró en recesión nesti 2012. Datos espublizaos pol Banco de España esti llunes estima que’l Productu Interior Brutu (PIB) del Estáu cayó nun 0,4 por cientu nel primer trimestre del añu.
 
La entidá que gobierna Miguel Ángel Fernández Ordóñez prevé amás que'l PIB se contraiga un 0,5 por cientu en tasa interañal mentes el primer trimestre del añu, lo qu'acabaría con una racha de siete trimestres siguíos de xubíes interañales. Nel cuartu trimestre del 2011, la economía estatal menguó un 0,3 por cientu en tasa intertrimestral, polo que la cayida del 0,4 por cientu esperada pol Banco de España supondría la vuelta del Está a la recesión téunica, esto ye, dos trimestres siguíos de crecimientu negativu.
 
L'institutu emisor precisa qu'esti comportamientu del PIB nel primer trimestre foi consecuencia d'una cayida de la demanda estatal de nueve décimes, compensada en parte por una aportación de la demanda esterior neto de seis décimes, con un empeoramientu de dambos datos respeuto al cuartu trimestre del 2011. No que se refier al emplegu, el Banco de España señala que volvió a baxar "con intensidá" nel primer trimestre del añu, con un retrocesu interañal "próximu al 4 por cientu".

secciones: