UNA considera que l’informe de FUNCAS "destapa les mentires del gobiernu asturianu sobre la crisis"

Unidá Nacionalista Asturiana manifestó la so “preocupación polos emponedores datos del informe de FUNCAS (Fundación de las Cajas de Ahorros), que coloca a Asturies na cola de tolos datos económicos en rellación cola crisis económica que tamos sufriendo” y amuesa a les clares que “les declaraciones del gobiernu asturianu de que aguantaríemos meyor la crisis que les demás comunidaes yeren y son cenciellamente mentires”.

El voceru d’UNA, Faustino Zapico conseñó “que l’informe dexa claro que la crisis tien sabor asturianu y que foi la falta d’iniciativa de los gobiernos asturianos lo que nos llevare a esta situación con una economía pocu productiva y pocu diversificada” fechu que “se lleva denunciando dende los seutores d’izquierda dende fai munchu tiempu”.

Pa la organización nacionalista rescampla que “nel únicu datu que nun tamos na cola ye en destrución d’emplegu, pero por desgracia l’informe de FUNCAS tamién dexa claro a qué se debe, a que somos la Comunidá Autónoma con menos persones dimpuestes a trabayar”. En palabres del portavoz nacionalista “estos datos faen urxente poner en marcha un programa específicu pa la xuventú basáu n’emplegu y vivienda digna pa que nun sigan emigrando xóvenes asturianos y llograr el regresu de toos aquellos que deseen facelo, como única forma de garantizar la viabilidá de la economía asturiana a mediu plazu tal y como ya reclamare al executivu asturianu UNA-Mocedá.”

Finalmente’l voceru d'UNA afirmó que “llamamos a qu’el gobiernu asturianu reflexone sobre estos datos y entame a trabayar pa superar la crisis d’anguaño en beneficiu de los seutores que más la sufren como son los trabayadores y autónomos, y ponga fin al gastu inxustificáu de dineru públicu pa garantizar la viabilidá de les grandes empreses costructores y de les entidaes financieres ya que les primeres nun tán xenerando emplegu y les segundes nun tán dando la lliquidez necesaria al sistema productivu”.