El PP pide al Principáu que torgue la esplotación de la mina de Salave, en Tapia

El diputáu del grupu parlamentariu del PP, Alfonso Román López pidió güei al conseyeru d'Industria y Emplegu del Principáu, Graciano Torre, que torgue que la empresa Esplotaciones Mineres del Cantábricu división minera Río Narcea Gold Mines, desrrolle'l nuevu intentu d'esplotación d'una mina en Salave, Tapia de Casariego. Román López indicó qu'esta esplotación diba acabar col modelu económicu del conceyu basáu nel turismu de calidá.
 
El diputáu del Grupu Parlamentariu del PP volvió a entrugar güei na comisión de la Xunta Xeneral del Principáu al conseyeru d'Industria y Emplegu pola recuperación per parte de la filial del Ría Narcea Gold Mines del proyeutu Salave.
 
El conseyeru indicó que lo que fizo la empresa ye solicitar permisos pa estudiar reserva d'oru na zona de cara a futura esplotación del xacimientu. Asina, l'espediente ta agora pendiente de que l'órganu medioambiental determine si ye necesario realizar una delcaración d'impautu ambiental.
 
Alfonso Román recordó'l comportamientu de la empresa en Belmonte qu'al so xuiciu recuerda a la película 'Coja el dinero y corra'. "Esplotaron dos o tres años la instalación con un mínimu impautu nel emplegu llocal y amás dexaron una cicatriz na zona que tardará años n'iguase", dixo'l diputáu del PP.
 
El diputáu 'popular' insistió amás en que'l conceyu de Tapia fizo una fuerte apuesta por un desarrollu económicu basáu en turismu de calidá, dalgo colo que'l proyeutu ye "incompatible dafechu", polo que pidió al Gobiernu que torgue'l so desarrollu y nun dea lluz verde al proyeutu.
 
Amás, Román López recordó'l refugu vecinal a l'actuación y dixo que si Tapia nun ye Reserva de la Biosfera ye por una cuestión alministrativa, porque les condiciones son iguales que les de Castropol, que sí lo ye.