La revista billingüe Atlántica XII preséntase con intención de "xuntar a la masa crítica d'Asturies, que ta espardida"

La nueva revista Atlántica XII  presentóse oficialmente al públicu como un mediu destináu a xuntar a la "masa crítica d'Asturies, que nesti momentu ta espardida", en pallabres del so director, el periodista Xuan Cándano.
 
La publicación presentóse nun actu públicu nel Edificiu Históricu de la Universidá d'Uviéu, nel qu'intervinieron, amás de Cándano, el rector, Vicente Gotor, y l'ex vicerrector, Pedro Sánchez Lazo, ún de los promotores de la idea.
 
 "Otros medios son posibles y necesarios n'Asturies". Foi la frase cola que Cándano resumió'l motivu del nacimientu d'esta publicación, en declaraciones a Europa Press. La revista va tener un carácter bimestral, y acompaña reportaxes de dellos aspeutos, tanto  políticos, como sociales, culturales o d'actualidá, pero siempre calteniendo un "espíritu críticu" del que, según el director, nesti momentu caracen los medios de comunicación n'Asturies.
 
 Los dueños del sector financieru na comunidá o la xestión de La Llaboral como centru d'arte, dambos trataos nel primer númberu d'Atlántica XII, dende'l pasáu vienres a la venta, son temes 'tabú' según Cándano, nos medios actuales. Poro, definió la revista como una publicación "valiente, independiente y llibre", puesto que va financiase de primeres colos soscriptores, y non coles ventes o la publicacidá. "Vimos qu'esa masa crítica existe, porque había 350 persones soscrites antes de salir el primer númberu, y xuntamos a esa serie de collaboradores, periodistes, historiadores y fotógrafos", esplicó.
 
 Sánchez Lazo destacó la importancia de contar con medios independenites y llibres. "Hai que ser conscientes de qué pasa, y poder dicir si ta bien, si ta menos bien o si ta mal", añadió.
 
 Pela so parte, el rector mostró l'apoyu de la Universidá a esta "idea magnífica" y afirmó que la institución va collaborar cola so distribución a nivel de departamentos y a nivel de profesores.
 
 LLINGUA EN MAXISTERIU
 
 La revista, con una primer tirada de 2.000 exemplares, ye billingüe, dao que "a nengún collaborador se-y diz en qué llingua debe escribir", esplicó Cándano. Asina, inclúi dellos artículos en llingua asturiana.
 
Gotor destacó la importancia d'esti factor na publicación, y recordó que cola nueva reforma universitaria l'asturianu va tar la primer vez nes enseñances reglaes de la Universidá. "Lo va tar en Filoloxía y espero tamién que tea en Maxisteriu", afirmó, tres lo que recibió un aplausu del públicu.