1.500 persones pidieron n'Uviéu la igualdá del asturianu na enseñanza

Na manifestación, que sofitaben sindicatos d'enseñanza y partíos políticos, pidióse la dimisión inmediata de la directora de Maxisteriu Gloria Tellez y desixóse al Rector y al Conseyeru d’Educación solucionen darréu la situación de la llingua na Universidá y nel sistema educativu.

 
Paula Cristobal, que lleó'l discursu de la XPLLA col qu'acabó la manifestación afirmó que "situaciones como la de la llingua el sistema educativu "dexen ver a les clares que la política de promoción llingüística que nos quieren vender ye un fraude".  
 
Según los convocantes ta en peligru la formación de los futuros profesionales de la enseñanza polo que ye necesaria "la creación d’una Mención de Llingua Asturiana y que permita la formación de los futuros mayestros y mayestres de Llingua Asturiana y la presencia d’asignatures de Llingua Asturiana nos estudios comunes d’Educación Infantil y Primaria en Maxisteriu, que permita la formación mínima necesaria pa que cualquier futuru mayestru o mayestra pueda desarrollar la so actividá docente na realidá sociollingüística d’Asturies, garantizando la igualdá de derechos llingüísticos y educativos de los neños y neñes falantes d’asturianu".