La Xunta llama a movilizase esti sábadu na defensa del asturianu nel sistema educativu

La Xunta pola Defensa de la Llingua Asturiana fai un llamáu a la movilización “p’aparar los intentos d’eliminación de la llingua asturiana nel sistema educativu”. Pa ello convoca una manifestación que va salir esti sábadu 7 de marzu a les 17:00 na Estación del Norte d’Uviéu. Los sindicatos d’enseñanza Fete-UXT, CCOO, USO y SUATEA dieron públicamente’l so respaldu a la convocatoria.

Dende la Xunta pola Defensa de la Llingua Asturiana señalen que “tenemos que volver movilizanos pa desixir al gobiernu asturianu que cumpla la llexislación vixente que regula la presencia del idioma nel sistema educativu, una llexislación que yá de mano ye curtia y probe pero qu’amás tán enfotaos n’achaplar”.

Asimesmo conseñen que “hai actualmente dos problemátiques concretes qu’amenazen seriamente’l derechu al estudiu de la llingua asturiana: La propuesta de la dirección de la Escuela de Maxisteriu d’escluir a la llingua asturiana de los nuevos planes d’estudiu qu’han aprobase nel procesu d’adaptación al nuevu marcu européu de Bolonia”. Dende la XDLLA pídese “la creación d’una Mención de Llingua Asturiana que permita la formación de los futuros mayestros y mayestres de Llingua Asturiana” y la “presencia d’asignatures de Llingua Asturiana nos estudios comunes d’Educación Infantil y Primaria que permita la formación mínima necesaria pa que cuanquier futuru mayestru o mayestra pueda desarrollar la so actividá docente na realidá sociollingüística d’Asturies, garantizando la igualdá de derechos llingüísticos y educativos de los neños y neñes falantes d’asturianu”.

Sicasi, otru de los problemes que mencionen dende la Xunta ye “la situación irregular y illegal, según sentencia del Tribunal Supremu, na que s’encuentren les plantíes de docentes d’asturianu na educación primaria, secundaria y bachilleratu”. Por ello demanden que se “dignifique y normalice la situación llaboral irregular de los mayestros d’asturianu y que se-yos reconozan los mesmos derechos y deberes qu’al restu docentes. L’asignatura de llingua asturiana forma parte del currículo y polo tanto debe tener la so propia especialidá, igual que’l restu materies que s’imparten n’escueles y institutos”.

Esta manifestación cuenta col sofitu de los sindicatos d'educación Fete-UXT, CCOO, USO y SUATEA y d'organizaciones polítiques como IX-BA-LV, Unidá Nacionalista Asturiana y Andecha Astur.