Softastur va traducir software llibre educativu al asturianu

Softastur va traducir "Edubuntu", una distribución del Sistema Operativu GNU-Linux empobinada a escolinos de 6 a 18 años y desendolcada internacionalmente por reconocíos educadores y tecnólogos. Softastur, coleutivu ensin ánimu de lucru formáu por programadores, alministradores de sistemes, profesores y traductores n'asturianu, dio anuncia tamién de que ta acabante de traducir el 100% de la suite oficial del sistema operativu Ubuntu.

"Edubuntu" ye una "derivación oficial de la distribución GNU/Linux Ubuntu, destinada pal so usu nel ámbitu escolar. Desendólcase en collaboración con docentes y teunólogos de múltiples países. Edubuntu construyóse sobre Ubuntu y incorpora usos educativos específicos, con un oxetivu nidiu: la población ente los 6 y los 18 años".

Dende Softastur conseñen que "nos caberos meses pudo vese la situación llamentable que se vien dando col asturianu en maxisteriu, y por estensión, nel sistema educativu asturianu. Énte la posible tentación a que daquién diga qu'ufrir estudios n'asturianu puede ser mui costosu, Softastur quier aportar el so granín de sable traduciendo al asturianu software educativu de calidá contrastada internacionalmente y ufriéndolo de baldre". El plazu marcáu ye finales d'abril.

Dende esti colectivu afiten que "dende yá, Softastur ponse a disposición de docentes y centros interesaos n'instalar y usar Edubuntu". Namás que tienen de contautar al traviés del formulariu disponible na direición http://softastur.org/contautu.php