Sobre les sigles d'Andecha Astur

A estes altures tener qu’escribir d’esta llamuerga fiede, fiede abondo, pero ye necesario, sobre too pa poner el puntu final a esta hestoria, polo menos pa esta parte de los protagonistes.
Una hestoria fedienta de la que preferimos nestos momentos nun remover muncho más, pa que'l fedor de lo podre siga nun sitiu fondero y somorgiau, y porque nun lo merecen nin les persones qu'en dalgún momentu confiaron n'Andecha Astur nin los simpatizantes del nacionalismu d'izquierda que lleven años presenciando un espectáculu llamentable.

Militantes d’Andecha Astur, que dedicamos munchos años de les nuestres vides pa llevar alantre unos principios políticos afitaos na democracia, ética, llibertá, xusticia…, principios qu'a la fin siempre fueron los que nos guiaron na nuesa vida política, queremos dicir de manera clara y al altu la lleva que nengún órganu nin persona tien lexitimidá xurídica y ética nestos momentos pa que la organización Andecha Astur se presente a les eleiciones. Referímonos a que nel pasáu mes de xunu del 2010 los xulgaos anularen por quinta vez los conceyos fraudulentos de militantes, fechos por una minoría col enfotu d’algamar el control de la organización ente los años 2006 y 2009, quedando Andecha Astur ensin nengún órganu de direición pa tomar determinos, esto ye, ensin la Xunta Executiva y la Xunta Xeneral, que nesti momentu llegalmente nun existen, como pue comprobar cualquiera que tenga'l cuayu, la moral o la paciencia pa consultalo.
 
Los aconceyamientos celebraos nestos meses pasaos con esa parte pa buscar una solución política sirvieron sólo pa evidenciar falta de madurez política y credibilidá por parte de los que güei dan un pasu atrás al presentar una candidatura en nome d'Andecha Astur. Dicho esto, reiteramos que nun vamos siguir escribiendo más capítulos d’esta murnia hestoria, polo tanto nun vamos abrir nenguna vía xudicial (sedría la sexta) que confirme una vez más les sentencies qu’anularen tolos congresos de los últimos 15 años.

Creemos que puxar pola vía del enfrentamientu xudicial o de la negociación nun merez la pena una vez que ye evidente que la marca Andecha Astur ta en vía muerta, ensin posibilidá d’alitar, nin de conseguir el mínimu sofitu del movimientu del que pretendió ser referencia durante tantos años. Nun vamos perder más tiempu con persones que consideren les sigles d’Andecha Astur patrimoniu familiar y qu'invalidaron esta sigla como organización democrática.

Vimos durante estos meses atrás fechos que nos ficieron pensar qu'un procesu de ‘reconcialiación’ ente militantes d’Andecha Astur que teníen en común una proximidá xeneracional (piénsese en conceyos como Maliayo, Corvera, Noreña, Carreño, Llangréu… ) yera posible. Conceyu Abiertu parecía dar continuidá política a munchos militantes d’Andecha y dexaba atrás el motivu que nos llevó a esta llucha cainita.

Evidentemente quedaba camín que percorrer, pero polo menos ya nun había la ‘gran torga’ pa poder col tiempu ponese d’alcuerdu y poder trabayar a lo menos de manera coordinada. Meses dempués lo que vemos ye que presentando les sigles Andecha Astur a unes eleiciones va dase un portazu irreversible y non sólo a una posible ‘reconciliación’ política de militantes d’Andecha Astur, sinón que va tapecese dafechu tamién la posibilidá d'integración d'esti sector nun procesu de xuntanza de la izquierda nacionaliega/asturianista.

Porque esti pasu atrás va evidenciar l'ausencia de confianza p’atopar interloculores, falta de credibilidá y de valentía de los que pudiendo dar un pasu alantre que fine nel necesariu cambiu xeneracional políticu d’un sector del nacionalismu, escueyen siguir na vía de dependencia política de la vieya guardia que los tutela y escueyen siguir nuna marxinalidá y un aislamientu que los vuelve alloñar de cualquier proyeutu compartíu seriu y de lo que piden la inmensa mayoría de los nacionalistes d'izquierda.

Sabemos que ye insalvable qu'esti artículu motive reacciones y discusiones alrodiu d’esta fedionda hestoria, pero pela parte de los que lu sofitamos volvemos a reitirar que damos por terminada esta andadura. Nun merez la pena perder más el tiempu, porque Asturies sigue necesitando'l nuestru trabayu y el nuestru compromisu.

Roberto Holgado, en nome de la Comisión escoyida pa representar a 65 militantes d’Andecha Astur.