La “Pita” de la Xunta volvió asistir a otru actu del presidente Areces

La perconocida “Pita” de la Xunta pola Defensa de la Llingua Asturiana volvió ayeri “tres los pasos del presidente Areces y acompañólu durante l’actu d’inauguración del Centru d’Empreses n’Asturies de La Caixa”, según informa la XDLLA nun comunicáu.

Dellos militantes de la Xunta recibieron al Presidente asturianu ente glayíos en favor de la oficialidá y con cartelos nos que podía lleese "Esti gobiernu marxina y reprime la llingua asturiana". Esta acción quier denunciar “la nefasta política llingüística que ta llevando alantre esti Gobiernu” y recordar “la neglixencia de quienes tán señalaos por organismos internacionales como la UNESCO o’l Conseyu d’Europa pola so responsabilidá ente’l peligru claru de desapaición del nuesu patrimoniu llingüísticu".