AXA afita que los conceyos nun pueden cobrar l’IBI a horros centenarios

L’Aconceyamientu de Xuristes pol Asturianu señala que “en rempuesta a la consulta fecha al Aconceyamientu por delles asociaciones pa la defensa del nuesu patrimoniu históricu sobre la llegalidá de les notificaciones que vienen faciendo los conceyos de Xixón y Piloña a propietarios d’horros centenarios, axuntando certificaciones individuales pal pagu del Impuestu sobre Bienes Inmuebles", conseña que los conceyos "tienen la obligación cívica de declarar la demisición d’oficiu”.

Dende l’AXA afiten que “L’artículu 62.2.b) del Testu Refundíu de la Llei Reguladora de les Faciendes Llocales, afita que tan disimíos del IBI, permediando solicitú al respeutu, pente otros, los bienes abarcaos pela disposición amestada segunda de la Llei 16/1985, de 25 de xunu, de Patrimoniu Hestóricu Español, na que s’incluyen los horros y cabazos más vieyos de cien años, qu’hai en Galicia y Asturies, de los que trata’l Decretu 449/1073, de 22 de febreru”. Nesi sen manifestóse espresamente “la Subdireición Xeneral de Tributos Llocales, pente medies de la Consulta Vinculante V0658-08, de 2 d’abril de 2008”.

Dende l’Aconceyamientu conseñen que “tolos titulares d’horros centenarios puen empobinar a los conceyos de Xixón y Piloña una solicitú de desimición del impuestu”. Arriendes d’ello, al Aconceyamientu de Xuristes pol Asturianu “abúlta-y necesario desixir a los conceyos de Xixón y Piloña que declaren d’oficiu la desimición del IBI pa los horros centenarios de los sos conceyos porque, penriba de pruyimientos recaudatarios, ta la obligación de les alministraciones municipales de cumplir bonalmente colos principios de conservación y proteición del patrimoiniu cultural asturianu, torgando actuaciones que, como la presente, puen ponelu en pelligru, propiciando la so destruición (si l’horru valta yá nun paga impuestos)”.