Xuristes pol Asturianu entrega un nuevu informe sobre l’asturianu al Conseyu d’Europa
|
23 Febreru, 2009 por Pablo R. Alonso
- Inicie sesión o rexístrese pa espublizar comentarios
L’Aconceyamientu de Xuristes pol Asturianu entregó’l so “Quintu Informe” al Conseyu d’Europa, "un trabayu técnicu nel que se razona y demuestra qu’acordies cola única interpretación posible del Instrumentu de Ratificación de la Carta Europea de les Llingües Rexonales o Minoritaries robláu por España, les sos autoridaes tan obligaes a xustificar énte’l Conseyu d’Europa les razones del incumplimientu de la parte III de la Carta no que cinca a la llingua asturiana”.
Según afiten dende l'Aconceyamientu, esti informe foi entregáu pente medies de la "Directorate General IV (Educación, Culture and Heritage, Youth and Sport)" del Conseyu d'Europa.
Tres esti pasu, según l'AXA nel “próximu informe (previstu pal añu 2010), el Gobiernu español tendrá de dar cuenta y razón al Conseyu d’Europa de por qué nun tien prevista una educación preescolar, primaria, secundaria, profesional y universitaria,n’asturianu; por qué los muérganos xurisdiccionales nun garanticen l’emplegu del asturianu nos procesos penales, civiles y contencioso-alministrativos; por qué les autoridaes alministratives nun fomenten l’emplegu de la llingua nel marcu de les alministraciones y servicios públicos; por qué nun se garantiza una televisión pública n’asturianu; por qué nun se-y da sitiu a la llingua asturiana na política cultural nel estranxeru (Institutu Cervantes, por exemplu); por qué nun s’ufre información n’asturianu dientro los hospitales y asilos; por qué nun se redauten n’asturianu les instrucciones de seguridá; o por qué nun se facilita l’averamientu ente los falantes asturianos de les estremaes comunidaes autónomes españoles nes que se fala la llingua y ente éstes y la fastera portuguesa na que tamién se fala; ello, pente otra bayura d’incumplimientos inxustificaos” que pal Aconceyamientu de Xuristes pol Asturianu, son “inxustificables".
Asturies.com ufre a los sos llectores, nun archivu adxuntu a esta noticia, el textu completu d'esti Quintu Informe.
| Adxuntu | Tamañu |
|---|---|
 V INFOR. AXA..doc | 62.5 KB |
Efrén d'Andrés
Comentarios
Munches gracies AXA. Ta visto que nesto, el gobiernu diba dexanos col culu a l'aire.
L'Estáu español, nesti tratu discriminatoriu pa cola llingua asturiana y la rempuesta de la AXA, yá tien (por que quier) la so piedriquina nel zapatu.
La mio esperanza ye que-y manque tanto que seya como mínimo pa dar un bon tirón d'oreyes al nuesu ineptu gobiernacu astur
Ta claro que nesti casu hai que desixir responsabilidaes. Al menos paez qu'esta vez, (nun sé si por tar metía una directora xeneral nel asuntu) la cosa ta teniendo mayor ecu mediáticu, anque al final quede too pa prau.