Alfredo González lleva'l premiu al meyor cantar

|

El cantante turonés Alfredo González recibió ayeri'l Premiu al Meyor Cantar pol tema "La nada y tu". El premiáu recibió'l galardón nuna gala que se celebró ayeri en Mieres, na qu'actuaron los 5 finalistes d'esti premiu entamáu pola Conseyería de Cultura. Alfredo González, como ganador del premiu al meyor cantar, va representar a Asturies nel festival de cantares en llingües minorizaes Liet Ynternasjonaal 2009.
 
Un auditoriu de la Casa la Cultura de Mieres atacáu de xente foi un abellugu perfectu pa saber que cantar diba llevar anguaño la etiqueta de "el meyor". La gala, conducida por Ana Vanesa Gutiérrez y Naciu Varillas, y retransmitida en directu pola TPA, consistía n'actuación de los cinco finalistes, amás d'un miniconciertu d'Herbamora, grupu ganador l' añu pasáu. Tres de l'actuación de los finalistes, Alfredo González, con 'La  nada y tu'; Bacotexo, con 'Queimar al cielo'; Felpeyu, con 'Refalfiu';  La Bandina, con 'Valse Coxu'; y Músicos pola Oficialidá, col so 'Garra  la pallabra', vinieron les intervenciones institucionales de Luis María García, Alcalde de Mieres, qu'agradeció que la conseyería volviere a escoyer Mieres pa entregar el reconocimientu, y Consuelo Vega,  Directora Xeneral de Política Llingüística, que valoró'l premiu como una manera de dar a conocer la música y la llingua asturiana.
 
De siguío dióse a conocer el ganador de la edición 2009, que foi Alfredo González pol cantar "La Nada y tu". El turonés, que xugaba en casa, dixo unes pallabres nes qu'agradeció a la discográfica Ámbitu l'apueste pol so discu n'asturianu, tuvo un recuerdu pa la so madre, arriendes de presentar y felicitar a los músicos que lu acompañaron na interpretación del tema ganador. Alfredo González nun ye un recién llegáu al mundu de la música, anque sí a la fecha n'asturianu. Con trés discos nel so haber, "La vida de alquiler", "Dudas y precipicios" y "La nada y tú", ye nesti últimu nel que se puede topar el tema ganador, tocayu del títulu del discu, y que lleva lletra del escritor Antón García. "La nada y tu" ye un tema de cantautor al que se-y amestaron refuerzos rockeros, principalmente de la mano de la guitarra eléctrica de Rubén Bada. El resultáu ye una base musical correcta sobre la qu'aposienta una perbona lletra d'Antón García. El restu del discu onde ta esti tema caltién la filosofía, la xuntanza ente la música fecha por Alfredo, principalmente en solitariu col so pianu, y testos escritos por autores asturianos y n'asturianu, reafirmando la rellación  llitero-musical que se vien dando na música n'asturianu davezu.
 
Algamar esti premiu, de vida corta ya qu'esta ye namás la so tercer edición, nun ye solo un reconocimientu pal artista a nivel d'Asturies, sinón que tamién mete en bolsu del ganador el billete pa representar a Asturies nel Festival de Llingües Minoritaries Liet Ynternasjonaal 2009, que va celebrase anguaño en Ljouwert/Leeuwarden (Países Baxos). Esti eventu podría considerase una suerte d'Eurovisión, nel que los países manden cantares y artistes a competir ente si, col oxetivu añadíu y más importante de dar a conocer la variedá llingüística y musical d'Europa. El festival, entamáu por una fundación, cuenta col sofitu del Conseyu d'Europa, y ésta va ser la segunda vegada na qu'haya representación asturiana, yá que l'añu pasáu foi'l grupu Dixebra'l que participó, algamando un segundu premiu per detrás del tema corsu ganador.

Contador Estadistiques