Valledor diz que pue incumplise'l pautu de gobiernu si se suprimen les places "orgániques" d'asturianu

El diputáu d'IU-BA-Verdes, Francisco Javier García Valledor, dixo güei que'l PSOE va incumplir  el pautu de gobiernu si da resultáu la intención de les conseyeríes d'Educación y d'Alministraciones Públiques que, según el diputáu, quieren prescindir de los profesores d'asturianu na plantía orgánica del profesoráu.

 
Valledor dixo tamién qu'espera qu'esi aspeutu de la plantía se corrixa colos mecanismos alcordaos pa solucionar diferencies nel senu del Gobiernu.
   
El pautu políticu de Gobiernu ente FSA-PSOE y IU-BA-Verdes establez, nel epígrafe d'Educación, que va garantizase la enseñanza del asturianu en tolos niveles y graos, respetando la voluntariedá del so aprendizaxe. Amás, añádese que la elección del asturianu como asignatura del currículu en nengún casu va poder ser motivu de discriminación de los alumnos y que va realizase un estudiu xurídicu pa evaluar la posibiidá llegal de la creación de la especialidá de profesor de llingua asturiana.
 
Según esplicó güei Valledor nuna rueda prensa ofrecida na Xunta Xeneral del Principáu (XXPA), el Gobiernu asturianu tien que remitir nes próximes feches, previsiblemente la próxima selmana, esa plantía orgánica a Madrid. Sin embargu, na mesma esclúise a los profesores d'asturianu, pese a que nuna primer comunicación a los centros educativos s'informaba de que s'introducíen profesores d'asturianu en 38 casos. Sin embargu, dempués, remitióse a los centros una nueva circular na que se dicía que nun se diba tener en cuenta a los profesores d'asturianu por "problemes xurídicos".
   
Valledor dixo que la situación xenerada poles conseyeríes d'Educación y Alministraciones Públiques constúi un "absurdu", dao que la propia Universidá d'Uviéu ta impartiendo titulaciones d'espertu d'asturianu que, si les conseyeríes d'Educación y Alministraciones Públiques siguen cola so propuesta, nun van valir pa nada.
   
Amás, señaló qu'anque l'asturianu nun seya tovía una llingua oficial existen n'otres comunidaes autónomes procedentes nos que los profesores sí taben na plantía orgánica. Punxo como exemplu'l casu de profesores de llingua aranesa na Generalitat de Cataluña.
   
Según los datos qu'ofreció güei Valledor, la midida afeuta a 168 profesores d'asturianu en  Primaria, 74 en Secundaria, amás de 69 itinerantes en primaria y ún itinerante en Secundaria. Tamién existen profesores d'asturianu n'educación infantil col mesmu problema, según el diputáu d'IU-BA-Verdes. Valledor apeló a la "cordura" de los responsables de les conseyeríes d'Educación y Alministraciones Públiques. Amás, señaló que, ante esta situación, diba paece-y "razonable" que la Xunta de Personal Docente non Universitariu llevare a los tribunales al Gobiernu del Principáu por esti asuntu.