Unos 20.000 asturianos van quedar sin ver la televisión tres l'apagón analóxicu, según un estudiu sobre TDT

|

Unos 20.000 asturianos van quedar sin ver la televisión n'abril del 2010 cuando se produza'l llamáu apagón analóxicu, según informó güei n'Uviéu'l director de desarrollu de negociu de SES-Astra, Miguel Pingarrón, que presentó les conclusiones d'un estudiu sobre la Televisión Dixital Terrestre (TDT) n'Asturies.
 
"Vemos mui difícil qu'exista un apagón analóxicu sin l'usu del satélite, a nun ser que se quiera dexar a xente sin televisión", aseguró Pingarrón, y añadió que nesti momentu existen 100.000 asturianos que tienen dificultaes pa ver la TDT.
 
Dende la empresa SES-Astra y al traviés d'esti estudiu sobre l'estáu de la TDT, piden a l'Alministración el compromisu de llevar la televisión al cien por cien de la población, y "non al actual 92 por cientu previstu n'Asturies".
 
Según la empresa, les redes terrestres cuenten con dos dificultaes principales, la dispersión xeográfica y la orografía, "dos requisitos que se dan n'Asturies". "Anque exista un 90 por cientu que vea la TDT el problema ye'l diez por cientu restante y exiximos una llexislación que cubra al cien por cien de la población qu'incluya terrestre y satélite".
 
"Nesti momentu hai unos compromisos redifusores estatales de cobertoria nacional, el 96 por cientu de les cadenes privaes y el 98 pa les públiques", esplicó Miguel Pingarrón, y aseguró qu'existen oxetivos de cobertoria en cada comunidá, y n'Asturies ye un 92 por cientu l'oxetivu de les televisiones privaes.
 
Según les pallabres del director de desarrolu de negociu de SES-Astra, "lo que se pretende facer ye incrementar esi 92 por cientu invirtiendo en coste en rede terrestre". Pa ello, según la empresa, el Principáu sacó dos concursos pa equipar colos emisores de televisión pa TDT.
 
"Los concursos tán sobre los 20 millones d'euros que va gastase l'Alministración pa subir d'esi 92 a un 98 por cientu que va implicar qu'un dos por cientu siga quedando ensin televisión", informó Pingarrón, qu'añadió que diben ser necesarios otros 15 millones d'euros pa garantizar l'accesu al dos por cientu de la población restante.
 
"En total 35 millones d'euros, una cifra muncho más elevada qu'una solución satelital", espunxo'l representante de la empresa.
 
Miguel Pingarrón espresó que'l satélite ye de "disponibilidá inmediata" y el coste de mercáu diba ser de "dos millones d'euros iniciales más dos millones añales". "Ye un coste que se podía utilizar pa tol estáu y que, comparáu col despiegue terrestre sólo n'Asturies, ye mui inferior a los 35 millones, a los qu'hai que sumar los siete millones en caltenimientu", añadió.
 
Nel restu de países europeos, según recordó Pingarrón, s'usa'l satélite pa cubrir les necesidaes de la población, menos n'España, onde por llei sólo se ta obligáu a llegar hasta'l 98%. "Sorpréndemos que naide nesti país lo vea", añadió'l director de Desarrollu de Negociu d'Astra, Miguel Pingarrón.
 
SES-Astra recurrió los concursos públicos pa l'ampliación de la cobertoria de televisión dixital n'Asturies.

Contador Estadistiques