Una burocracia qu'hai que cumplir

Tamos avezaos a entender el conceutu de “Burocracia”, como daqué negativo. Dalgo qu’enguedeya y retarda cualquier asuntu. Un entramáu de papelos y funcionarios que tán ehí pa fastidianos la vida y facer que, una cosa que nos ye necesaria, tardemos en consiguila o, nel peor de los casos, nun lleguemos a ella por cansanciu o aburrimientu.

Esta ye la idea que tenemos de la burocracia, sofitada n’esperiencies personales qu’asoceden tolos díes. Ensin embargu, podíemos dicir qu’esi nun ye’l conceutu “real” de la pallabra. Diz, al respeutu, el María Moliner: Burocracia: “Conxuntu de los funcionarios, normes y organismos de l’alministración d’un estáu.” Y, pela so parte, el Diccionariu de la R.A.E. defínela de mou más precisu: “Organización regulada por normes qu’establecen un orde racional pa distribuyir y xestionar los asuntos que-y son propios.” Quier dicise que la burocracia ye una cosa necesaria pa que l’estáu funcione. Más entá: Un conxuntu de persones, asociación, partíu, fundación, sociedá recreativa o cultural, y nun digamos ayuntamientu, comunidá o estáu, nun podría funcionar ensin burocracia. Ye dicir, ensin unes normes escrites que den les pautes y regulen los asuntos de les competencies de cada grupu humanu que lu compón.

Pero ye que, amás, eses normes, esa “burocracia”, ye la que garantiza la democracia. Si nun hubiere normes, cada mandatariu podría facer les coses al so gustu, conceder o torgar, facer o inhibise, autorizar o prohibir al so llibre albedríu. Les normes regulen, llexitimen derechos, marquen pautes. Con elles, ún sabe a qué atenese. Sabe si tien posibilidá de facer dalgo y, si la tien, naide pue quita-y esi derechu. En realidá, de lo que protestamos, de lo que nos quexamos, y con razón, ye del ESCESU de burocracia, de lo que podíemos llamar “burocratismu”, o ya camudao n’enfermedá, “burocratitis”. Pero eso ye otra cosa.

Que’l direutor xerente de la ZALIA diga que pidió “permisu oral”, pa treslladar los horros de San Andrés de los Tacones, nun ye admisible. Cualquier persona, y sobre too cualquier funcionariu o persona que trabaye pa l’alministración, y SOBRE TOO si esa persona tien responsabilidaes, debe cumplir con esa burocracia, con eses normes que torguen la posibilidá de que se produzan irregularidaes y, polo tanto, inxusticies. Si l’alministración nos desixe a los ciudadanos una serie de papeleos, de trámites, de “burocracia” pa cualisquier cosa que vaigamos a facer (y munches p’actividaes privaes y cuasi íntimes) ¿cómo nun se va a desixir a un responsable de la mesma que cumpla con ellos tal y cual manden eses normes? ¿Qué exemplu va a tener la ciudadanía, de los que manden, si son ellos los primeros qu’incumplen les “sagraes normes escrites”?

Porque si les coses funcionaren asina, bien ceo dibemos ver a un Promotor Inmobiliariu llamar por teléfono y dicir de pallabra al funcionariu: “Oye, tíu, que voi facer unes casines ehí xunto al Piles. Dígotelo de pallabra ¿eh?”. Y lo mesmo’l qu’abre una zanxa en mediu la cai, o el que va a presentase a unes oposiciones, o conduz un coche, o solicita una beca, o entierra a un familiar. El “non, díxelo de pallabra”, ye volver a la cueva, al primitivismu, a l’arbitrariedá, al imperiu de los que tienen el poder y la fuerza y nun tienen que cumplir obligaciones, nin dar nenguna desplicación. Poro, a esi tal Enrique Álvarez, direutor xerente de la ZALIA, qu’avisa del treslláu de los horros “de forma oral”, pido dende equí que lu cesen del so puestu nel menor tiempu posible. Anque seya avisándolu “de pallabra”.