Francia inclúi les banderes bretona y corsa nes nueves plaques de matrícula
|
18 Febreru, 2009 por Pablo R. Alonso
- Inicie sesión o rexístrese pa espublizar comentarios
El pasáu 11 de febreru’l gobiernu francés dio’l preste pa los nuevos diseños de les matrícules d’automóviles. La novedá ye que los modelos aprobaos son d’ámbitu “rexonal”, y van incluir l’escudu o’l símbolu de les rexones correspondientes. Amás nel casu corsu inclúi la bandera de la islla y nel bretón la bandera del país y la denominación billingüe francés-bretón (Bretagne/Breizh).
Francia, l’estáu tradicionalmente más centralista d’Europa, acaba de dar un pasu simbólicu nel reconocimientu de les sos minoríes. Anque nun pasa de ser un xestu, enforma pa colos corsos y bretones, el fechu d'incluyir la bandera corsa (la “testa mora”) y la bretona (la “gwenn ha du”) supón un pasu inéditu nun estáu que tradicionalmente suel refugar cualesquier tipu de reconocimientu a símbolos “rexonales”.
Según la llei qu’afita’l Sistema Nuevu de Matriculación, estes “deben portar una identificación territorial constituida pol logu oficial d’una rexón y el númberu d’un de los departamentos d’esa rexón”.
Asturies.com ufre nesti enllaz los nuevos modelos de plaques de vehículos en Francia.
Efrén d'Andrés
Comentarios
Francia pon estes nueves matricules y equí cuando se faló d'esto montose la de dios porque delles autonomies querien poner la so bandera y les sos sigles nes matricules.
Ye verdá qu'esto nun pasa de ser una anécdota, pero yo creo que ye significativa.¿Imaxinaisvos que'l gobiernu español sacare esti tipu de matricules y pa enriba cola denominación billingüe como nel casu bretón? Yá sentiríemos la cantinela del "separatismu que ruempe españa" y toes eses chorraes. Ehí tenemos a la xacobina y centralista Francia amosando que a lo menos nesti casu concretu son bastante mas civilizaos y razonables que los españoles.
Lo que pasa ye que vascos, catalanes, occitanos, saboyanos y otres naciones queden ensin matricula polo que se ve. Lo de Bretaña ye raro enforma, que-yos aceuten la bandera y la llingua.
Y tien razón nordés, equí tovia cola imposicion d'Aznar.
Nun ía que touviera bien la O pa representar a Asturias, pero polo menos estremabas d'óu yaras. Agora tócanos achantar cona matrícula uniformizadora d'Ansar cona sida que venía meyor pa las viendas de coches de segunda mano, una babayada cumo outra cualquera. Lo de las bandeirinas taría muito bien nun siendo que la FSA quixera espetanos la de Castiel.la, claro. Estráñame que catalanes ya vascos nun se-ys oiga l.luitar por el.lo.
Veovos muy contentos, y nun quiero estropear la folixa, ye un xestu perguapu, pero si nun vien acompañáu d´otros xestos como descentralización, reconocimientu de les llingues, etc nun valdra un res.
por que ye noticia esta pijada exactamente ?
Ye verdá, los vascos nun apecen, tan dientro de la rexón d'Aquitania(departamentu de los Pirineos Atlánticos, compartiendo departamentu colos bearneses(occitanos)).Los catalanes dientro de Languedoc-Rosselló(compartiendo departamentu-Pirineos Orientales- colos occitanos de Fenolheda). Los occitanos si salen espeyaos, lo que pasa que tan dixebraos ente les rexones d'Aquitania, Midi Pirineos, Languedoc-Rosselló, Auvernia, Limosin, Auvernia, PACA(Provenza-Alpes-Costa Azul) y parte de la de Ródano-Alpes.