La Xunta convoca una manifestación el 7 de marzu poles agresiones a la llingua na enseñanza

L'asociación va entrevistase nos próximos díes con sindicatos y otros colectivos p'atropar apoyos a les movilizaciones de protesta contra "l'intentu d'eliminación de la llingua asturiana" y alerta pola "situación irregular y illegal na que s'atopen los docentes y l'asignatura d'asturianu". Tamién pide la creación de la especialidá d'asturianu y la non discriminación de los escolinos.

Según la Xunta pola Defensa de la Llingua Asturiana hai amenaces d'un "retrocesu de más de 10 años" na situación de la enseñanza de la llingua asturiana.

La organización qu'articula'l movimientu de reivindicación llingüística n'Asturies rescampla  que "la Dirección de la escuela de Maxisteriu tien de facer una nueva propuesta que s'acepte na Xunta d'Escuela" pero "pel momentu nun se conoz plan alternativu, pero el silenciu per parte de la dirección oblíganos a movilizanos". Les reivindicaciones céntrese en " una Mención de Llingua Asturiana que substituya al títulu actual d'Espertu en Llingua Asturiana; y les asignatures comunes de llingua asturiana nes especialidaes d'Educación Primaria y Educación Infantil que garanticen a tolos docentes la formación imprescindible pa trabayar na realidá sociollingüística de les escueles d'Asturies".
 
La Xunta rescampla tamién que "ye necesario que se dignifique y normalice la situación llaboral irregular de los mayestros d'asturianu, que-yos reconozan los mesmos derechos y deberes qu'al restu docentes, y que se cumpla la llei que reconoz que los escolinos y escolines qu'estudien asturianu van tener la mesma formación que los demás y que nunca llegó a aplicase na enseñanza secundaria". Poro el pidimientu concretu ye que la llingua asturiana tenga "la so propia especialidá, igual que'l restu materies que s'imparten n'escueles y institutos y ha ponese clase nes mesmes condiciones" y el peligru, según la organización de defensa de los derechos llingüísticos ye que "la non creación d'esta especialidá solo podría significar una cosa, la intención de les alministraciones de caltener l'asignatura nuna posición marxinal y inestable que permita la so eliminación nun futuru próximu".
La manifestación va celebrase'l próximu sábadu 7 de marzu a les 17.00 n'Uviéu dientro d'una riestra d'aiciones rellacionaes, y la XPDLA tien intención d'atropar apoyos durante los próximos díes nos sectores educativos y otra mena de colectivos.