La UNA pide que l’alministración “asuma les deudes” de les PYMES y autónomos

|

Unidá Nacionalista Asturiana fixo público al traviés d’un comunicáu “la so petición de que los gobiernos dexen de financiar los beneficios de la banca y asuman deuda de pymes y autónomos pa inyectar asina recursos nel sistema productivu real”. Pa la UNA “nun ye xustificable apurrir dineru a los bancos ensin contraprestaciones y ver como'l gobiernu estatal s'amiya énte los sos intereses, mientres hai tantes empreses pequeñes rentables en peligru de zarrar”.

El portavoz d'UNA, Faustino Zapico llamentó que “Rodríguez Zapatero afronta les consecuencies de la crisis a base de fondos públicos pero ensin iniciatives pa dinamizar la economía nin el mercáu llaboral” lo que ye "descorazonador y desalentador, porque sabemos que la economía del estáu ta en manes de Botín y de los sos collacios, que siguen atropando beneficios astronómicos".  

El portavoz nacionalista declaró que “la financiación a los bancos al traviés de mercar activos o d'alcuerdos coles Alministraciones son un fracasu yá que los fondos nun lleguen al sistema productivu” y polo tanto “en cuenta de subvencionar a entidades financieres habría sofitase a pymes y autónomos con problemes pa siguir la so actividá, pol aumentu d'impagos y deldes qu'arrecostinen.”

Pa UNA, la forma de sofitar a Pymes y autónomos ye que les Alministraciones “asuman eses deudes que los afueguen y asina inyectar dineru directamente al sistema productivu, arreblagando perriba de la mediación financiera de los bancos que ta siendo una llaceria pa la economía nesti periodu de crisis”.  

Zapico rescampló “que nun ye xustificable apurrir dineru a los bancos ensin contraprestaciones y ver como'l gobiernu estatal s'amiya énte los sos intereses, mientres hai tantes empreses pequeñes rentables en peligru de zarrar pola falta de pagu de grandes compañíes y pola negativa de los bancos a descontar efectos comerciales” porque amás “el gobiernu garante'l beneficiu de la banca ensin desixir que financien a les empreses y que descuenten los pagarés colos que cobren munches pequeñes empreses y autónomos, colo que se ta poniendo en peligru la economía y la creación d'emplegu”.

Contador Estadistiques