El colectivu universitariu Fai! acusa al Rectoráu de "falta de voluntá política y cinismu" pa normalizar l'asturianu

El colectivu universitariu Fai! acusó al equipu rectoral de "falta de voluntá política" pa normalizar la llingua asturiana dientro de la institución académica. La organización criticó'l refugu, per parte de los averaos a Vicente Gotor, nel conceyu de la Comisión de Reforma de los Estatutos de la Universidá, de dos propuestes: una de Fai! pa que l'asturianu fuere llingua propia universitaria, y otra p'adautar la Llei de Promoción y Usu del asturianu a la institución.
 
   Según Fai!, la razón dada fueron "problemes xurídicos", lo cual consideró "una hipocresía pa evitar facer avanzar la llingua asturiana na Universidá", polo que solicitó que "se garantice la non discriminación de les y los falantes d'asturianu".
 
   Según Fai!, "esiste un problema de falta de voluntá política y compromisu del actual rector cola llingua asturiana". Pa esta organización, "defender l'asturianu ye muncho más que facer bolígrafos, taces y camisetes billingües". "A pesar del compromisu anunciáu por Vicente Gotor col asturianu, la situación d'esta llingua dende la so llegada nun fizo más que caltenese na mesma situación desastrosa carecida demientres el mandatu de Vázquez", añadió'l colectivu.
 
   A lo último, solicitó "al rector que cumpla les sos promeses electorales y s'implique col desendolcu de garantíes xurídiques que permitan a los asturiano-falantes la igualdá de derechos dientro de la Universidá d'Uviéu, evitando cualquier discriminación por motivos llingüísticos".