Fala non caduca autoedita'l so primer discu

Yá ta disponible una nueva referencia discográfica de rock n'asturianu. Fala non Caduca ta distribuyendo'l so primer discu, un cd con seyes cantares. El grupu apostó pola autoedición como fórmula pa llevar esti discu al mercáu, acordies col so espíritu independiente y revindicativu.
 
Fala non Caduca fórmelu músicos de varios puntos d'Asturies -L.lena, Xixón Uviéu...- iguando una banda con una instrumentación perfecta pa lo que pretenden facer, rock-ska, con pingarates de folk o reagge. Asina'l grupu son Lobo.voz y coros, Xicu na guitarra, Xuan cola batería, Torre nel baxu, "Litros" na otra guitarra, Milio na gaita.y Mateo y Carlos que formen la sección de vientu cola trompeta y el saxu tenor respectivamente. El so estilu va na llínia de lo que se vien escuchando na escena ska alternativa nos últimos años, toques xamaicanos nel ska -Fermín Muguruza marca tendencia-, pero que n'Asturies tien un toque d'especificidá cola incorporación de la gaita dando un sabor o recuerdu a música folk. Con too y con ello, y pa buscar referencies cercanes y conocíes pola aficionáu a la música asturiana, hai que dicir que cuando se siente a Fala non Caduca ye imposible nun alcordase de Dixebra y buscar y topar les comparances.
 
Ésta llínia musical vese bien clara nesti primer cd de la banda nomáu"en llignua afilida", títulu que vien al pelu sintiendo les lletres del grupu y el espíritu revindicativu que domina na filosofía del grupu. Y ye que Fala non caduca tien, por poner un casu, ente una de les sos principales esmoliciones la defensa de la llingua asturiana, d'ehí'l nome del grupu y l'usu esclusivu del asturianu na so música. Pero amás d'eso, les lletres d'estos seyes cantares tamién falen d'otres revindicaciones amás de convidar en too momentu a entamar folixa. A les lletres de calter revindicativu xúntense unes guitarres skatalítiques, una gaita folixera y unos vientos que siguen les bones llecciones de los míticosThe Specials, llevando a la banda a poder ser encaxaos fácilmenten na llínia dominante de lo que se llama na actualidá rock n'asturianu.
 
"en llingua afilida" grabóse a lo llargo de los meses d'avientu de 2008 y xineru de 2009 nos estudios Miler de Mieres. Pa la grabación contóse cola producción de Marco Castañón, gaiteru de Skanda, que d'un tiempu a acá ta prodigándose na so actividá como productor. La distribución del discu que sal con llicencia creative commons ye, como la producción del mesmu, autoxestionada, colo que pa facese con él lo meyor ye visitar los locales onde suelen tar a la venta esti tipu de discos, o ponese en contactu col grupu al traviés del so myspace.