El xuiciu al independentista asturianu por intentu d'atentáu en Piloña va quedar vistu pa sentencia güei

El xuiciu al indepentendista asturianu Fernándo G. R., al que detuvieron en L'Infiestu (Piloña) cuando, según la versión policial, se disponía a colocar una artefautu esplosivu na sede del PSOE, va quedar güei vistu pa sentencia cola celebración de la segunda y última sesión na Audiencia Nacional.
 
La xueza Ángela Murillo va escuchar güei na estaya cuarta de la sala de lo penal de la Audiencia, la declaración d'un peritu, que nun pudo dir a la primer sesión del xuiciu, celebrada'l pasáu 12 de xineru. Tres esta intervención, van quedar les conclusiones de la defensa y l'acusación, pa dempués quedar vistu pa sentencia. El fallu va conocese nos díes siguientes a la vista.
 
El xuiciu va acabar definitivamente ensin que l'acusáu puea declarar. La xueza impidió-ylo na primer sesión al pretenter Fernando G. facelo en llingua asturiana. La lletrada del indepentendista, Begoña Lalana, solicitó un recesu pa tentar de que'l so cliente reconsiderare la decisión de nun declarar, anque ésti se caltuvo na so posición. Asina, a la entruga del fiscal Miguel Ángel Carballo, de si confirmaba la so declaración policial, contestó: "sí, ratifícola". Esti fechu motivó que la xuez-y torgare siguir declarando n'asturianu.
 
Dase la circunstancia de que díes enantes del xuiciu, la defensa recibiere una notificación de l'Audiencia Nacional na que se confirmaba la concesión de la presencia d'un intérprete pa realizar la traducción.
 
Sí declararon, na so defensa dellos dirixentes del movimientu sindnical asturianu qu'acreditaron la participación del acusáu en protestes de carácter llaboral, "ensin rellación con reinvindicaciones polítiques". "Ye un rapaz solidariu, prudente, non exhibicionista y parcu en pallabres --dixo ún de los testigos--. Un home bonu, como diría Antonio Machado, nel meyor sen de la pallabra".
 
Per parte de l'acusación, testificaron dellos de los axentes que realizaron la so detención, na madrugada del 12 al 13 de setiembre del 2005. Según esplicaron estos últimos, cuando se produxo l'arrestu, l'acusáu taba nel interior d'un vehículu aparcáu a unos cien metros de la sede del PSOE de L'Infiestu. Nesti momentu, los alvirtió de que xunto a los pedales había un "bichu prendíu" que diba esplotar, en referencia al artefautu, qu'ún de los axentes algamó desactivar apagando les sos meches.