Refúndase'l Conseyu Asesor pa desarrollar la Ordenanza del Asturianu en Xixón

L'organismu, que va asesorar al Conceyu de Xixón en materia llingüística, incorpora miembros de partíos políticos y organizaciones sociales y profesionales y entama a funcionar depués de l'aprobación de la Ordenanza del Asturianu. L'anterior conseyu, del que yeren parte colectivos como la Xunta, que yá nun tán presentes nesti, dimitiera en 2006, como protesta pol bloquéu a les sos iniciatives.
 
Amás de Jesús Montes Estrada "Churruca" como presidente del Conseyu, incorpórense como miembros Ramón d'Andrés (como espertu propuestu pola Alcaldía), Julio Ramos del PSOE, Humberto Gonzali del PP, Roberto Colunga d'IU-BA-Los Verdes, Consuelo Vega del Principáu d'Asturias, Jordán Suárez del Conseyu de la Mocedá de Xixón, Urbano Rodríguez de la Academia de la Llingua, Isabel Tuñón de la Federación d'Asociaciones de Vecinos, Xosé M.ª García de l'asociación de vecinos de la zona rural «Les Caseríes» , Jorge Espina de CC OO, José Luis Llera d'USO, Berto Cobreros de SUATEA, Carmen Moreno de la Unión de Comerciantes y Ricardo Álvarez de l' Asociación d'Hostelería. 
 
L'anterior Conseyu Asesor de la Oficina Municipal de la Llingua de Xixón, taba formáu por representantes de SUATEA, CCOO, UXT, Xunta pola Defensa de la Llingua Asturiana, Academia de la Llingua Asturiana, Foru Arte Ciudá, Conseyu de la Mocedá de Xixón, Unión de Comerciantes y "El Garrapiellu”. Tolos sos miembros alcordaron por unanimidá dimitir n’avientu de 2006 como protesta pola falta d'avances en materia llingüística y el bloquéu a les sos propuestes de normalización, ente ellos la Ordenanza que proponíen al equipu municipal de PSOE ya IU.