Los Centros Asturianos de Lausanne y Berna van acoyer en mayu los actos oficiales del Día de les Lletres

|

Los Centros Asturianos de Lausanne y Berna, dambos en Suiza, van ser esti añu sede oficial de los actos que s'organicen con motivu del Día de les Lletres Asturianes 2009 nel Esterior. Asina se decidió nel conceyu qu'ayeri caltuvieron el presidente del Conseyu de Comunidaes Asturianes, Manuel Fernández de la Cera, y la directora xeneral de Política Llingüística, Consuelo Vega, col representante de l'Academia de la Llingua, Pablo Manzano.

El Día de les Lletres asturianes nel Esterior ta organizáu pol Conseyu Asturianu de comunidaes asturianes, cola collaboración de l'Academia de la Llingua y otros departamentos del Gobiernu del Principáu d'Asturies. Entamó celebrase nel añu 2001, siendo naquella ocasión sede'l centru asturianu de Les Palmes.

Dende entós, como esplicó la Conseyería se vien celebrando tolos años col mesmu criteriu que pal Día d'Asturies nel Esterior, ye dicir alternando añalmente centros asturianos d'España, restu d'Europa y América, como sedes oficiales. Según l'orde establecíu, la próxima edición debía celebrase nun Centru Asturianu d'Europa. N'España, amás de Les Palmes, yá fueron hasta'l momentu sedes les ciudaes de Logroño, nel 2004, y Madrid, nel 2007. N'América, s'elixeron Montevideo nel 2002, Bonos Aires, nel 2005, y Chile nel 2008. En cuanto a los centros d'Europa, fueron sede del Día de les Lletres París, nel 2003, y Liexa, nel 2006.

Nel conceyu d'ayeri, amás d'elixir el llugar, tamién se fixaron les feches de celebración, que van ser los díes 23 y 24 de mayu. El tema central de les actividaes a desarrollar va ser la poesía asturiana actual, igual que na pasada edición.

Anque'l programa definitivu tovía nun se peslló, yá s'adelantaron dalgunos conteníos, como por exemplu contar cola participación de José Luis García Martín, profesor titular de Lliteratura de la Universidá d'Uviéu, poeta y críticu lliterariu. García Martín va impartir una conferencia y va encargase de realizar la selección de testos de poetes asturianos pa diseñar la edición trillingüe (asturianu, francés y alemán), que va publicase coincidiendo con esta celebración. Tamién va llevase a los centros de Suiza la esposición de la Conseyería de Cultura y Turismu 'Miraes: un añu d'Asturies en fotografía. IV esposición de l'Asociación Profesional de Fotoperiodistes Asturianos'.

Contador Estadistiques