La Xunta de Personal Docente va demandar xudicialmente al Gobiernu asturianu

La Xunta de Personal Docente Non Universitariu d’Asturies, formada polos sindicatos SUATEA, FETE-UGT, CC.OO, ANPE y CSIF, va demandar xudicialmente al gobiernu del Principáu por “vulneración de Derechos Fundamentales y Llibertaes Públiques”, yá que según denuncien la Conseyería d’Educación niégase a facilitar les propuestes de plantiyes orgániques de los centros educativos pal cursu que vien.

La Xunta de Personal Docente, órganu representativu de los profesores d’infantil, primaria y secundaria d’Asturies, aconceyó de forma estraordinaria pa pidi-y a la Conseyería d’Educación les propuestes de plantiyes orgániques pal cursu que vien n’Asturies. La so presidenta, Beatriz Quirós, de SUATEA,  quixo recordar que “los centros educativos finalizaron el so periodu d’alegaciones a la plantiya’l vienres pasáu ensin que la información preceptiva fuere facilitada a la Xunta como marca la llexislación vixente”.
 
Según Quirós “énte la insistencia de la Xunta de que se facilitare la propuesta de plantiyes, como fixeron tolos anteriores gobiernos y equipos de la Conseyería, el Conseyeru Iglesias Riopedre manifestó que debería consultar cola Conseyera d’Administraciones Públiques. Énte esta situación, delegaes y delegaos de los cinco sindicatos que forman la Xunta de Personal, decidimos permanecer na Conseyería d’Educación a la espera d’una respuesta”.

Dende la Xunta de Personal Docente conseñen que “tres esperar durante hora y media la posible respuesta del Gobiernu asturianu, ensin qu’esta se produxere, vimos con sorpresa qu’en cuentes de la esperada respuesta del Conseyeru y de los sos superiores inmediatos, quien fixo actu de presencia a les puertes de la Conseyería fueron dos dotaciones de la Policía autonómica”.

Finalmente Beatriz Quirós señaló que “tres considerar esti xestu como una descortesía y una amuesa del talante del gobiernu asturianu, la Xunta de Personal decidió entamar darréu actuaciones xudiciales pa lo que yá formalizó la so relación con un bufete asturianu que va encargase de demandar al Gobiernu asturianu por vulneración  de Derechos Fundamentales y Llibertaes Públiques”.