"Funeral y velatoriu" polos horros desapaecíos en Xixón

La Plaza del Ayuntamientu de Xixón va acoyer el  llunes 9 de febreru a les 20.00 una protesta, organizada por Unidá Nacionalista Asturiana (UNA), pol valtamientu d'ocho horros en Xixón y pola situación xeneral del patrimoniu asturianu, y la política fiscal que se-y aplica.
"Nesti funeral", señaló la organización, "que quier valir como denuncia pola desidia y permisividá tanto del gobiernu municipal como de la Conseyería de Cultura nesti casu, o de protesta pola situación del patrimoniu en Xixón, UNA va denunciar de la mesma manera como 'inconsciente' la inclusión de los horros como elementos patrimoniales suxetos al impuestu del IBI (contribución) en Xixón, lo que pue suponer un incentivu pa destruyir o simplemente dexar cayer los horros, dao que'l so caltenimientu supón un aumentu na carga económica adicional".
El voceru de Vivienda de la organización nacionalista, Daniel Fernández, señaló que "los xixoneses tán viendo con incredulidá les contradiciones descaraes ente lo que diz la Conseyería de Cultura del Principáu, y lo que plantega'l conceyal d'Urbanismu del Conceyu de Xixón, Pedro Sanjurjo". "Mientres que per un llau sólo se reconoz un casu a sancionar, dende la Conseyería fálase de cinco, amás de nun quedar nada claro qué permisos y cuándo se dieron pal supuestu treslláu de dalgunos de los horros", añade'l representante de la formación.
Esta diferencia na información ye pa Daniel Fernández, "una clara muestra de dos coses, per un llau, el desastre no que se refier al control de la conservación del patrioniu asturianu, y per otru, que se quier crear una cortina de fumu no referente a esti casu, tentando de protexer a los verdaderos responsables, el gobiernu de PSOE-IU en Xixón y nel Principáu, que dan patente de corsu a la sociedá pública que realiza'l proyeutu de la Zalia pa que faiga lo que-y dea la gana".
Pa Daniel Fernández ye "mui triste" que les "instituciones tengan la inmoralidá de nun facer casu a les denuncies de los vecinos, y en cuanto salta la noticia a la prensa tengan respuestes onde ayeri sólo teníen evasives y la téunica de pasase la pelota d'unos a otros", lo qu'en pallabres del voceru nacionalista, "demuestra'l verdaderu interés del PSOE y IU pol patrimoniu d'Asturies, nengún".