Los profesores d’asturianu desixen la creación de la especialidá y piden aconceyar con Riopedre

Na reunión d’esti vienres pa tratar la recién sentencia del Tribunal Supremu sobre la calificación profesional de los profesores d’asturianu y gallego-asturiano en primaria y secundaria, estos decidieron, según pudo saber Asturies.com, reclamar a la Conseyería d’Educación la creación de la especialidá de llingua asturiana y de gallego-asturiano. Asimesmo, una representación d’esti colectivu va pidir una reunión col conseyeru.

El salón d’actos del IES Alfonso II d’Uviéu acoyió una asamblea d’unos 60 profesores interinos de Llingua Asturiana d’Enseñanza Primaria y Secundaria pa valorar les consecuencies que sobre esti colectivu de trabayadores de la enseñanza va tener la nueva catalogación de los sos puestos de trabayu. Tamién asistieron representantes de los sindicatos CC.OO y SUATEA.

Ente lo alcuerdos algamaos rescampla la demanda de la creación de les especialidaes de llingua asturiana y gallego-asturiano, lo que supondría que los aspirantes que superasen un procesu selectivu asemeyáu al de les otres especialidaes formaríen parte de la plantiya de funcionarios docentes. Anguaño toles places cúbrense con funcionarios interinos.

Asimesmo los profesores d’asturianu van pidir una reunión col conseyeru d’Educación, José Luís Iglesias Riopedre, pa treslladar esa petición y conocer qué planes tien l’administración pa cola asignatura d’asturianu, yá qu’hasta agora nun hai nada concretao. Sicasí, tamién planteóse la necesidá de facer movilizaciones, posibilidá que contó col sofitu de los dos sindicatos educativos presentes.