K-Nalón renuncia a participar nos Premios de la Música

|

La banda de hip-hop K-Nalón ta acabantes de dar anuncia per aciu d'un comunicáu de prensa la so renuncia a participar nos Premios de laMúsica. El grupu ta nomináu na categoría de Meyor Cantar n'Asturianu, xunta otres trés bandes como La Bandina, Músicos pola Oficialidá y Esther Fonseca. K-Nalón basa la so decisión nel so desacuerdu cola política de xestión de la propiedá intelectual de la SGAE.
 
Los Premios de la Música entámalos l'Academia de las Artes y las Ciencias de la Música, entidá fundada pola Sociedá Xeneral d'Autores y Editores (SGAE) y Artistes, Intérpretes y Executantes, Sociedá de Xestión d'España (AIE). Ye nesti puntu onde K-Nalón ve incompatible la so filosofía de grupu cola política que desenvuelve la SGAE toncantes a los derechos d'autor. Nel comunicáu espublizáu el grupu en primer llugar esclaria que "Consideramos positivo qu'alguien punxera'l güeyu en nós, pero queremos facer publico que, anque tamos agradecíos pola nominación, nun queremos formar parte de tales premios". K-Nalón tamién desplica cómo ye posible que siendo un grupu que nun ta rexistráu na SGAE, un cantar suyu puede tar nomináu nos mencionao premios, "el cantar col que tamos nominaos ye "Dixebra", un cantar que forma parte del tributu-homenaxe que ventidos bandes asturianes fiximos al grupu Dixebra. Esti discu ta rexistrau na SGAE, pero K-Nalón nun lo ta" Darréu d'esta aclaración, la banda desplica la so postura con respecto a la SGAE y pola que renuncien a participar nos premios, "el nuestru grupu apuesta dende'l principiu pola llibre difusión de la música y la cultura, y nesi sen toles nuestres creaciones tienen llicencia Creative Commons del tipu Reconocimientu-Non comercial-Sin obres derivaes (3.0 España License). Y ye ehí onde la nuesa filosofía choca colos planteamientos de la SGAE. Respetamos a tolos grupos que formen parte de la SGAE, pero nosotros nun compartimos la politica d'esta entidá y tamos totalmente escontra'l famosu CANON que graba'l preciu de munchos productos electronicos."
 
Pa finar K-Nalón platega a la SGAE que sustituya al grupu por dalgún de les bandes que quedaron fuera del cuartetu finalista, ya que consideren que sedría "un actu hipocrita pola nuesa parte aceptar cualquier nominación fecha pola SGAE. Énte ello, K-Nalón acaba mandar un comunicau a esta entidá pa que nun cuenten con K-Nalón, y reconsideren a los otros grupos que nun entraron como finalistes. Polo que tenemos en conocimientu ye la primer vez que se plantea esta cuestión nos premios anuales de la Academia de la Música. 
 
A la espera de que  contestación va dar la SGAE, pel momentu los cantares que quedaríen como finalistes sedríen La Bandina col tema "Valse coxu",cantáu por Alicia Álvarez (Pauline en la playa), el colectivu Músicos pola Oficialidá, que d'unos años a esta parte reúnese una vez al añu pa facer un tema de sofitu a la oficialidá, en 2008 esti mecigayu de músicos asturianos ficieron el tema "Garra la Palabra, y completaría'l tríu Esther Fonseca, col cantar "Negra", tema incluyíu nel so últimu discu en solitariu "Viaxe".

Contador Estadistiques