Polémica nel Gobiernu asturianu por una carta del director de Cooperación Rafael Palacios a Zapatero

La portavoz del executivu asturianu, Ana Rosa Migoya, desautorizó y criticó duramente al Director de l’Axencia Asturiana de Cooperación del Principáu d’Asturies, Rafael Palacios, tres unviar esti una “carta abierta” al presidente del Gobiernu español, Rodríguez Zapatero, na que-y pide la suspensión de les esportaciones d’armes a Israel y Colombia.

Na so carta’l dirixente del Bloque por Asturies amuesa la so "sorpresa énte les declaraciones de Zapatero nes qu’afirmaba’l so convencimientu de que’l material bélicu esportáu a Israel nun s’usó pa cometer violaciones de derechos humanos como homicidios deliberaos y arbitrarios a civiles, yá que más allá de la dificultá de verificar les sos afirmaciones, l’Estáu d’Israel nun reveló la totalidá del armamentu usáu". Por ello’l Director de l’Axencia Asturiana de Cooperación pedía al presidente español "la suspensión de les esportaciones españoles de material de defensa y doble usu a Israel y Colombia hasta que desapaezca cualesquier riesgu de que l’armamentu o otru material militar nun será utilizáu na comisión de violaciones de los derechos humanos".
 
Pela so parte la portavoz del Gobiernu asturianu, Ana Rosa Migoya, “desautorizó públicamente” al traviés d’una nota de prensa la carta unviada, conseñando que “al  marxe de les razones que movieren al señor Palacios a unviar la carta –que la Conseyera Portavoz nun entra a valorar yá que nun se trata d’un asuntu que fuere tratáu, de nengún mou, nel Conseyu de Gobiernu- l’Executivu asturianu considera una conducta inapropiada l’actitú del director d’una Axencia que nun tien nin competencies nin autorización pa dirixise a la Presidencia del Gobiernu d’España”.

Finalmente Ana Rosa Migoya añadió que “nel casu del Sr. Rafael Palacios llueve sobre moyao. Nun ye la primer vez que toma una iniciativa que nun se correspuende coles sos responsabilidaes de xestión y que, llamentablemente, perxudica los intereses de tolos asturianos”.