El PSOE d'Uviéu pide al alcalde que prescinda d'ún de los sos asesores y Asciz táchalu de "ruin y miserable"

|

El Grupu Municipal Socialista exixó güei al alcalde d'Uviéu, Gabino de Lorenzo, que prescinda del so asesor personal en materia d'Urbanismu, César Fernández Cuevas, que percibe un salariu añal de más de 82.000 euros --más de 13 millones y mediu de les antigües pesetes--. Pela so parte, Asiz tachó al primer edil de "ruin, cobarde y miserable".

Dambos grupos manifestáronse asina dempués de que De Lorenzo, según anunció al traviés d'un mediu de comunicación, decidiere suprimir el 90% de la sovención municipal a los tres grupos políticos, y suprimir un conceyal lliberáu a caún d'ellos, como midida d'austeridá.

El PSOE d'Uviéu, nun comunicáu, aseguró que'l caltenimientu d'esti "xubiláu" como asesor del alcalde ye un caprichu personal del propiu Gabino de Lorenzo, polo que consideró que "nada meyor que prescindir d'él, pues trátase d'un asesor con un trabayu que puen facer los funcionarios y que si faltare nun lo diben notar los ciudadanos".

Los socialistes exixen al alcalde qu'esplique si les places de persones de confianza, con supresión anunciare yá van ser oxetu de "funcionarización" y si lo qu'agora ye un puestu de confianza va pasar a ser una plaza convocada públicamente.

"Dicho d'otra manera, queremos que mos esplique si lo qu'agora se paga como 'confianza' va pasar a correr a cargu del presupuestu municipal, una vez se desarrollen les convocatories públiques correspondientes d'eses places", destacó'l PSOE.

Amás, los socialistes quieren que Gabino de Lorenzo esclarie si va caltener los "salarios millonarios" de dellos de los conceyales del so equipiu de Gobiernu, puesto que recordaron que cuatro d'ellos --Isabel Pérez-Espinosa, Agustín Iglesias Caunedo, Alberto Mortera y Arias Cachero-- perciben nesti momentu más de 73.000 euros añales, lo que significa una midida de más d'un millón de pesetes al mes, si se divide ente doce.

Pela so parte, el conceyal de l'Asamblea de Ciudadanos pola Izquierda (Asciz), Roberto Sánchez Ramos, aseguró güei que "si dalgo tien claro ye que nun va marchar" y va siguir trabayando "como hasta agora polos ciudadanos d'Uviéu, a pesar de los munchos interrogantes que van abrise de magar xineru". Sánchez Ramos calificó al alcalde, Gabino de Lorenzo, como "un personaxe ruin, cobarde y miserable, que nun ye quién a mirar a los güeyos de la xente y a sentase a dialogar".

"Un alclade que se refuxa detrás de notes qu'unvía a un mediu de comunicación da una idea de la talla personal, ética y humana de tal personaxe", dixo Sánchez Ramos, qu'añadió que Gabino de Lorenzo ta "fuera de tou control democráticu, hasta del del so propiu partíu".

Acusólu tamién de quere "sabotiar el llabor de la oposición", porque'l so oxetivu ye "eliminar cualquier participación y control de lo que fai'l so equipu de Gobiernu".

Sánchez Ramos aseguró qu'ensin dedicación completa "diba se-y imposible siguir desarrollando'l llabor que-y encamentaron los ciudadanos", dalgo que sólo puen facer "los ricos como De Lorenzo". "Yo nun tengo empreses como él", dixo Sánchez Ramos, qu'aseguró que yá recibieron mensaxes de ciudadanos que-y pide que nun cole y hasta-y planteguen paga-y el so salariu con pequeñes ayudes.

Contador Estadistiques