Réeditase “Inaux” de Güextia, ún de los primeros discos de rock n’ast

En 1988 veía la lluz ún de los discos pioneros del rock n’asturianu: “Inaux” de Güextia. 22 años dempués, esti trabayu reéditase en formatu cedé p’averar a un mayor públicu una ayalga dientro del rock y la música n’asturianu.

Güextia formóse n’Avilés en 1983 baxo llideralgu d’Adolfo Camilo Díaz, destacada y polifacética figura venceyada a la cultura asturiana. Cola compañía d’otros músicos como’l renomáu guitarrista Rafa Kas o’l batería Fredi Sánchez –dempués militante en Dixebra-, Güextia foi una de les primeres bandes en facer rock n’asturianu.

“Inaux” (FonoAstur, 1988) foi la so primer y única referencia discográfica. Rock contundente, guitarreru, y unes lletres lliteraries rescamplen pelos once temes que formen el trabayu editáu nel so día en vinilu. Tal foi l’éxitu algamáu nel momentu qu’una discográfica ufiertó-yos regrabar “Inaux” y editalu en castellanu, daqué refugáu pola banda por mor del so compromisu llingüísticu.

Reedición en cedé
Esti martes 21 de setiembre, nel alcuentru de L’Arribada 2010, presentóse la reedición en cedé d’esti trabayu descatalogáu dende yá va tiempu. Ensin dubia esti fechu va valir pa que les vieyes xeneraciones s’alcuerden y les nueves s’averen a un discu pioneru nel rock fecho na nuesa llingua