La Tertulia Pachín de Melás alderica sobre la rede ferroviaria del país

La Tertulia Pachín de Melás vuelve a l’actividá. “Hai una llínia trazada: la rede ferroviaria asturiana” ye’l títulu de la prósima tertulia que va tener llugar el xueves 23 en Xixón y na que va participar xente venceyao a la materia.

Yá hai tiempu que l’agrupación de Xixón d’Unidá Nacionalista Asturiana punxera en marcha la Tertulia Pachín de Melás, un espaciu d’alderique sobre estremaos temes qu’afecten a l’actualidá asturiana. Tres de les vacaciones, la Tertulia torna col oxetivu d’aldericar sobre problemes y soluciones pa cola actual rede ferroviaria del país.

Na tertulia van participar Carlos García Alcalde, miembru del colectivu "Asturias en tren" y autor del artículu "¿Un Feve para el siglo XXI?" espublizáu en La Nueva España; José Luis Delgado, miembru del Sindicatu Ferroviariu; y Rubén Ardura, autor del artículu "AVE cantábricu, el mitu de la eficiencia" espublizáu na revista Atlántica XXI.

Informal y participativa
Como ye vezu na Tertulia Pachín de Melás, l’acuentru va tener llugar nun ambiente informal y participativu ente los asistentes. El d’esti xueves 23 va ser a les 20.30 hores nel Bar Cantábrico de Xixón, asitiáu énte los Xardinos de la Reina.