Asturies Llaica convoca una concentración pol llaicismu n’Uviéu

L’Asociación Asturies Llaica convoca una concentración llaica n’Uviéu. L’actu quier dar respuesta al posicionamientu católicu de l’Alcaldía, que mandó una nota a conceyales pa que confirmaren presencia na misa de San Mateo.

El pasáu 3 de setiembre l’Alcaldía d’Uviéu unvió a tolos conceyales una nota informativa sobre la misa de San Mateo na Catedral d’Uviéu del 21 de setiembre, amás de pidir confirmación d’asistencia per parte de los ediles. L’asociación Asturies Llaica protestó con un escritu mandáu per rexistru a Gabino de Lorenzo, alcalde d’Uviéu, del que nun hubo respuesta.
 
“Nun estáu aconfesional y en plenu siglu XXI resúltanos anacrónicu que’l Sr. Alcalde, conceyales del Ayuntamientu y funcionarios de la nuesa ciudá y rexón, exerzan les sos funciones participando n'actos netamente relixosos”, criticaron dende Asturies Llaica na carta unviada a Gabino de Lorenzo.

Énte’l silenciu del alcalde uvieín, Asturies Llaica convoca una concentración pacífica, al mesmu tiempu que la misa, pa rechazar que les autoridaes públiques participen n’actos relixosos a nivel oficial. “Un actu relixosu nun hai qu’interpretalo en clave d’actu públicu oficial, sinón empobináu a los creyentes d’una relixón, polo que la presencia de cargos públicos como tales, nun tien llugar”, finalicen.